Kosbedrywe gaan hóés vir nuwe inspeksies
VOEDSELVERWERKERS salto t R20 000 per jaar moet opdok vir die nuwe verpligte inspeksies wat die Departement van Landbou, Bosbou en Visserye verlede jaar van stapel gestuur het.
Die inspeksietariewe vir verwerkte en ingemaakte voedselsoorte is in Junie in die Staatskoerant afgekondig. Die kommentaar tydperk het op 15 Julie gesluit. Die maatskappy Impumelelo Agribusiness Solutions is aangestel om dié inspeksies te behartig.
Landbouweekblad het verlede jaar (3 Februarie 2017, bl. 18) berig dat dié inspeksies ingestel is kragtens die voorskrifte van die Wet op Landbouproduk standaarde( Wet 119 van 1990).
Dr. Mduduzi Ngcobo, uitvoerende hoof van Impumelelo Agribusiness Solutions, sê hulle het heelwat kommentaar van die verskillende bedrywe ontvang, hoofsaaklik oor die hoë voorgestelde inspeksiekoste. Vir plaaslik vervaardigde kosse sal inspeksies vier maal per jaar gedoen word, met ’n tarief van R1 509 per inspeksie.
LABORATORIUM KOSTE
Dit is egter nie die enigste bedrag betaalbaar nie. Verdere laboratorium koste word gehef nagelang van die produk wat geëvalueer word: Die bykomende koste vir heuning is R2 980, vir asyn R667, vir vetsmere R1 185, slaaisouse R435, rooibos R180 en tafelolywe R456.
’n Heuningverpakker sal dus R4 489 per inspeksie moet betaal, oftewel amper R20 000 per jaar, slegs vir inspeksies.
“Maar hierdie is slegs voorgestelde tariewe,” sê Ngcobo. Die maatskappy sou vanaf 27 Julie met belanghebbendes begin vergader vir “’n deurlopende reeks gesprekke”.
“Die verskillende bedrywe sal geleentheid kry om die koste en die toepassing van die inspeksies te bespreek en voorstelle te maak. Dit is dus ’n inklusiewe proses en sal nie sonder konsultasie met die verskillende bedrywe deurgevoer word nie,” sê hy.
Ander produkte wat ingevolge dié wetgewing teen verskillende tariewe geïnspekteer sal word, is vrugtesappe, bevrore vrugte en groente, konfyt, vetsmeer, mayonnaise, slaaisouse en blikkieskos (sampioene, smere, vrugte, ens.).
KWAAI KRITIEK
Sedert die aankondiging daarvan loop die inspeksies reeds deur onder striemende kritiek van produsenteorganisasies en boere, wat meen dit verdubbel die bestaande gehalteprosesse en sal kospryse nóg verder verhoog.
Die maatskappye wat vir die inspeksies aangestel is, is Nejahmogul Technologies and Agric Services (melkprodukte), Agency for Food Safety (vleis en eiers) en Impumelelo Agribusiness Solutions (alle verwerkte en ingemaakte voedsel).
Luidens ’n verklaring deur die departement omvat dié reëling melk en nagemaakte melkprodukte; alle tipes vleis en eiers; en verwerkte voedsel, soos rooibos, heuning, tafelolywe, vrugtesap, vrugte en groente (ingemaak, bevrore en gedroog) en enige ander verwerkte voedsel waarvoor regulasies in die wet voorgeskryf word. Al dié kossoorte sal onderhewig wees aan ’n statutêre heffing en inspeksies, wat gedoen sal word by fabrieke, verwerkingsaanlegte, verspreiding sentrums, hawens en kleinhandelaars.