Besproeiing: Wes-Kaapse boere van SA se suinigste
DIE Wes-Kaapse besproeiingsboere is die doeltreffendste watergebruikers in Suid-Afrika.
Volgens data wat deur mnr. André Roux, raadgewer aan die kantoor van die premier van die Wes-Kaap, saam met die Wêreld natuur fonds( W W F) ingesamel is, word minder as 6 000 m3 water per hektaar per jaar in die Wes-Kaap vir besproeiing gebruik.
Daarteenoor is die verbruik 10 000 m3 per hektaar per jaar in Mpumalanga en bykans 9 000 m3 per hektaar per jaar in Limpopo.
Hierdie syfers is deur die WWF op ’n onlangse boeredag naby Robertson bekend gemaak met die doel om boere bewus te maak van die uitwerking van die afgelope droogte en die kwessies wat voorlê weens klimaatsverandering.
Een van die redes waarom Wes-Kaapse besproeiingsboere minder water per hektaar as hul eweknieë in die noorde gebruik, is omdat sagtevrugte minder water nodig het as subtropiese vrugte en suikerriet. Die besproeiingsboere van die Wes-Kaap het egter ook die produktiewe gebruik van water verbeter juis omdat die beskikbare water in die provinsie deurentyd minder raak.
30%MINDERREËN
Die WWF voer aan boere reg oor die land sal water in die toekoms nóg doeltreffender moet aanwend om volhoubaarheid te verseker.
Die vooruitsigte van klimaatsverandering beteken die huidige reënval sal oor die volgende 30 jaar met 30% verminder. Dit sal nie net die afloop van reënwater en dus die jaarlikse opgaarvolumes verminder nie, maar ook ’n nadelige uitwerking hê op die aanvulling en gevolglik beskikbaarheid van ondergrondse waterbronne.
Die tekort aan water in die 2017-’18-produksietyd het die Wes-Kaapse primêre landboubedryf bykans R6 miljard gekos weens laer opbrengste. Die WWF voer aan tegnologieë wat reeds op die plaas benut word, soos die FruitLook-program, moet in die toekoms produktiewer aangewend word. Daarbenewens sal nuwe tegnologieë ontwikkel en omarm moet word om volgehoue, verhoogde produktiwiteit van elke liter water in die toekoms te verseker.
* Meer inligting is beskikbaar by die Suid-Afrikaanse waternavorsingskommissie www.wrc.org.za; Fruitlook www.fruitlook.co.za; Elsenburg: www.elsenburg.com/ drought; die WWF: www. wwf.org.za; en die Wes-Kaapse “Groen-Agri”-webwerf: www.greenagri.org.za.