Vra vir Faffa
Ek is in die distrik Musina in Limpopo. Kan ek spanspekke onder spilpunt plant en gaan daar ’n probleem wees met vlekke op vrugte op nat grond? Die plant van spanspekke onder spilpunt of oorhoofse besproeiing word nie aanbeveel nie. Die groot rede daarvoor is dat spanspekke kwesbaar is vir blaarsiektes, veral donsige skimmel en poeieragtige meeldou. Spanspekblare wat nat is (weens oorhoofse besproeiing), sal swamsiektes bevorder en ’n geskikte omgewing vir die swamme skep om te leef en te oorleef. Wat die vrug betref, spanspek is kwesbaar vir Fusarium, wat deur nat toestande op die grond geaktiveer en vererger kan word.
Die meeste boere in die noordelike dele van Suid-Afrika plant spanspek onder drupbesproeiing. Die gebruik van ’n laag swart plastiek bo-op die rye bied dié voordele: Die vrugte bly skoon indien dit op die plastiek lê, terwyl die drupbesproeiing keer dat die grond buite die plastiekgebied nat is. Gevolglik kan vrugte bemark word sonder die moeite om dit te was. Dít kan veral op rooi kleigrond ’n probleem wees. Die plastiek help ook met die onderdrukking van onkruid. Nóg ’n voordeel is die besparing van besproeiingswater danksy verdamping wat beperk word. Die algemene praktyk is om ’n strook plastiek van een meter breed bo-op die walle te sit nadat die drupperlyn aangelê is. Die wydte van die strook in die ry is dan sowat 700 mm. Die res van die plastiek aan die kante word onder die grond ingedruk.