Maak ’n pot soos die meesters
Piet Marais en Frik Oosthuizen, die potjiekoskenners van Via se gewilde program Laat die potte prut, gee die lekkerste resepte vir voorpotte, hoofpotte, bypotte en napotte in ’n splinternuwe kookboek. Hier is ’n voorsmakie daarvan.
Mossels in ’n bier-roomsous
45 ml olyfolie 1 ui, gekap 4 knoffelhuisies, fyn gekap 200 g spekvleis, grof gekap 340 ml lager-bier 250 ml room Sout en vars gemaalde swartpeper 1 kg mossels, skoongemaak
Verhit die olie in ’n mediumgroot pot. Voeg die ui, knoffel en spek by en braai 5-8 minute lank of tot dit begin verbruin. Voeg die bier by en prut tot die helfte van die bier weggekook is. Voeg die room by en prut nog 5 minute lank. Geur goed met sout en peper. Plaas die mossels in die pot en sit die deksel op. Stoom 3-5 minute lank of tot die skulpe oopgaan. Gooi die mossels weg wat nie oopgegaan het nie. Skep die res van die mossels in bakkies en sit dadelik voor. Lewer 4 porsies.
Potbroodrolletjies
1 kg witbroodmeel
10 ml sout
1 pakkie (10 g) kitsgis
10 ml olie
10 ml suiker
750–950 ml louwarm water
30 ml gesmelte botter, vir smeer
Smeer ’n groot platboompot en die deksel. Meng al die bestanddele, behalwe die botter, goed. Knie dan die deeg tot dit glad en elasties is. Plaas die deeg in ’n bak, bedek dit met ’n klam doek en laat die deeg rys tot dit verdubbel in grootte (sowat 30 minute). Knyp die deeg af en rol in balletjies (eiergrootte). Plaas die deegballetjies in die voorbereide pot. Sit die deksel op en plaas 20 minute op ’n warm plek om te rys. Plaas dan die pot oor stadige kole en skep ook kole bo-op die deksel. Bak 50-60 minute lank tot gaar. Smeer die bokant met die botter die laaste 10 minute voor dit gaar is. Lewer 48 rolletjies.
Skaapskenkelpot in portmarinade
Hou in gedagte dat die vleis die vorige dag gemarineer moet word.
4 mediumgroot, heel skaapskenkels
100 ml port
50 ml worcestersous
50 ml olyfolie
3 groot uie, in skyfies gesny
2 rooi soetrissies, in repe gesny
2 liter rooibostee, gemaak met
6 sakkies rooibostee
750 ml rooiwyn
1 kg baba-aartappels, gewas, met skil
1 kg groenboontjies
250 g babawortels, geskil
20 ml “Mother in law”-speserye of 5 ml droë brandrissievlokkies
30 ml fyn koljander
75 ml braaivleisspeserye
25 ml bruinasyn Sout en peper
250 g knopiesampioene
VORIGE DAG
Spoel die vleis af. Meng die port en worcestersous en spuit dit met ’n spuitnaald in die vleis in (tot so teenaan die been as moontlik). Giet die res van die portmengsel oor die skenkels, bedek en marineer oornag in die yskas.
MAAK POTJIE
Dreineer die skenkels en behou die marinade. Verhit die olie in ’n nommer 3-pot oor warm kole (met vlam) en braai die skenkels tot goudbruin rondom. Skep die vleis uit en hou eenkant. Braai die uie en soetrissies in dieselfde pot tot sag. Skep dit uit en hou eenkant. Plaas nou die skenkels terug in die pot en giet die marinade, 1 liter van die rooibostee en die wyn by. Sit die pot se deksel op en laat vir 60 minute prut. Voeg die gebraaide uie en soetrissies by en pak die aartappels, boontjies en wortels in lae bo-op die vleis. Strooi al die speserye oor, voeg die asyn by en geur met sout en peper na smaak. Sit die deksel op en laat 2 uur lank prut. Vul die vloeistof aan met die res van die rooibostee, indien nodig. Voeg die sampioene by en laat vir 30 minute prut. Verwyder die pot van die kole en laat 15 minute staan voordat dit voorgesit word. Lewer 4 porsies.
Biltongpot
Ons Suid-Afrikaners kan maklik omgekoop word met biltong. Dit is ook ’n vinnige potjie om te maak.
45 ml olie 6 uie, grof gekap 1 houer (250 g) knopiesampioene
1/2 groen soetrissie, in blokkies gesny 1 knoffelhuisie, gekap Sout en peper 1 pak (200 g) spekvleis, in stukkies gesny 1 pak (500 g) skroefnoedels 1 pak (500 g) wilde- of bruinrys 375 ml witwyn 375-500 ml water 750 g beesbiltongskyfies 250 g cheddarkaas, gerasper
Verhit die olie in ’n groot pot oor matige kole en braai die uie, sampioene, soetrissie en knoffel tot die uie sag is. Geur met sout en peper na smaak. Voeg die spekvleis by en braai vir 2 minute. Voeg die pasta en rys by en roerbraai om die ryskorrels met die vet te bedek. Voeg die wyn en water by en laat vir 20 minute prut oor matige kole. Voeg die biltong by en prut vir 5 minute oor stadige kole. Roer die biltong deur die pastamengsel. Strooi die kaas oor en laat 5 minute staan. Sit die potjie dadelik voor. Lewer 6 porsies.
Griekse klappertert
Tert 125 g botter
250 ml louwarm water
3 eiers
250 ml suiker
250 ml koekmeel
15 ml bakpoeier ’n knippie sout 500 ml klapper
Stroop
250 ml suiker + 250 ml water
Tert: Smeer ’n platboompot goed. Klits die botter, water, eiers en suiker saam. Sif die meel, bakpoeier en sout saam. Voeg die klapper by en meng. Voeg die meelmengsel by die bottermengsel en meng goed. Skep die beslag in die voorbereide potjie. Sit die deksel op die pot en bak vir ongeveer 40 minute lank oor stadige kole.
Stroop: Kook die suiker en water 5 minute lank saam. Giet die stroop oor die warm tert sodra die tert van die kole af kom. Sit die tert louwarm of koud voor saam met vla. Lewer 6 porsies.
VOLGENDE WEEK
Slaai met spiere vir die winter.