Veeverslag
BOERE in die wintereënstreek van Suid-Afrika moet in hul pasoppens wees vir uitbrekings van bruin maagwurm nadat milde reën geval het. Hierdie bosluise kan veral ná ’n ernstige droogte probleme by vee veroorsaak.
Dr. Faffa Malan, bestuurder van die Herkouerveterinêre Vereniging van Suid-Afrika (RuVASA), sê in sy Junie-verslag oor siektes wat deur veeartse in Suid-Afrika aangemeld is boere behoort in elk geval gereeld die vyfpuntplan te gebruik om op die hoogte van kuddegesondheid te bly. Dit behels die volgende aksies: Ondersoek die neusarea vir neusvlieglarwes (neuswurm), longwurm, longontsteking, bloutong en ammoniak. Ondersoek die oog vir bloedarmoede wat deur haarwurm, haakwurm, grootbekwurm, lewerslakwurm en peervormige slakwurm veroorsaak word. Ondersoek die skaap vir ’n kwakkeel weens haarwurm, lewerslakwurm en peervormige slakwurm. Kondisietelling omdat bruinmaagwurm, maagbankrotwurm, bankrotwurm, langnek-bankrotwurm, witbankrotwurm, knoppieswurm, grootbekwurm, sambokwurm, peervormige slakwurm en lintwurm die dier se kondisie kan laat verswak. Vuilbroektelling weens besmettings van bruinmaagwurm, maagbankrotwurm, bankrotwurm, langnek-bankrotwurm, witbankrotwurm, knoppieswurm, grootbekwurm, sambokwurm, peervormige slakwurm, lintwurm en koksidiose. Vir meer inligting daaroor besoek die rubriek Vra vir Faffa op Landbou.com (https://bit. ly/2O9lfOg)
Haarwurmbesmettings is ook in sewe provinsies deur veeartse aangemeld. Baie boere dink hierdie wurms is in die winter dormant, maar dit is nie heeltemal waar nie, sê Malan. Simptome wat op besmetting dui, is kwakkeel en bloedarmoede.
Kriptosporidiose saam met patogeniese Escherichia coli veroorsaak steeds groot probleme vir bees-, skaap- en bokboere. Jong diere is uiters kwesbaar. Biosekerheid moet te alle tye op die hoogste vlak toegepas word. Boere moet ooie en koeie se immuniteit op die hoogste vlak hou sodat hul bies, wat met passiewe immuniteit verband hou, hul lammers en kalwers kan beskerm.
Die TABEL som siektes en toestande op wat gedurende Junie by RuVASA aangemeld is.