Angus gesels
Groen gras, spierwit sandkuile en die diepblou see maak Mosselbaai se Pinnacle Point-baan werklik spesiaal.
As ek terugdink aan my eerste en enigste ronde op Pinnacle Point by Mosselbaai, onthou ek die volgende: Die asemrowende uitsig van die klubhuis af oor die diep, blou Indiese Oseaan; Die vars seelug en die fynbosreuk wat veral ’n Karooboer kan betower; Die dramatiese ontwerp van die putjies wat teen die kranse ver bokant die branders uitgekerf is; Die lang-lang sandkuil van 300 m, net links van die 18de putjie, ’n afdraande syfer 5 van 463 m; En seker die lekkerste vier syfer 3-putjies wat ek tot nog toe op een baan beleef het. Ek wonder ook hoe ouens met hoogtevrees die kwaai afdraande-rit met die gholfkarretjiepaadjies, met die rotse en wit skuim daar doer onder, oorleef.
Dit is ’n mooi plek hierdie, en ’n “moet speel”-baan wat natuurlik ook in ’n uitmuntende toestand is – hulle ontsout blykbaar self al hul besproeiingswater.
MIN STRUIKELBLOKKE
Pinnacle Point is in 2006 ontwerp deur Peter Matcovitch en Darren Clarke, ’n voormalige Britste Ope-kampioen. Dit is heel speelbaar vanaf die geel bowwe se 5 750 m. Maar dis eintlik die sewe of wat putjies op die rand van die kranse wat die baan maak – soos veral die 13de putjie (syfer 3) van 125 m.
Die sewende en negende putjies is nóg treffende syfer 3’s – eersgenoemde met ’n setperk wat ook as walvis-uitkykpunt kan dien; laasgenoemde met ’n setperk wat net mooi tussen die klubhuis en die see inpas.
Die res van die baan het genoeg sandkuile en kontoere om dit interessant te maak, maar daar is min bome en geen varswaterhindernisse om jou bofhoue te beperk nie.
WINDLAWAAI
Kyk egter eers mooi na die weervoorspelling voor jy ’n ronde bespreek, want die wind kan jou dag bitter moeilik maak. Die Nomads het glo op so ’n onstuimige dag ’n kompetisie gehou waarin spelers moes raai hoeveel balle deelnemers met verloop van die spel sou verloor! Ekstra tyd by die pragtige 19de putjie sal egter vergoed vir sulke tye.
WAARDEER JOU EIE
’n Mens kan jou amper nie indink dat Pinnacle Point geklop kan word wat ligging betref nie, maar as jy dalk ’n vakansie NieuSeeland toe beplan, daar in Hawkesbaai lê ’n baan wat plek-plek selfs skouspelagtiger is. Cape Kidnappers is 140 m bo seevlak en ’n balletjie hang glo vir 14 sekondes in die lug voor dit doer onder in die water plons. Die baan is deel van ’n groot private wildreservaat, wat voorheen ’n Merino-plaas was en dus die klubhuis se skeerhuis-tema geïnspireer het. Dit kos egter meer as R3 000 per ronde – en dit net vir die gholf.
Dit kan dan ’n duur uitstappie wees as vroulief en Boeta wil saamspeel. Dalk moet ons die waarde vir geld wat ons op ons eie bane kry, meer waardeer. 044 606 5300; golfbookings@pinnaclepointestate.co.za