DIEANDERSÊ
Jy kan nie probleme wat dekades oud is, oplos deur dieselfde ding oor en oor te probeer en ’n ander uitkoms te verwag nie, skryf die finansiële joernalis Bruce Whitfield. Dit is tyd vir ’n noodtoestand oor werkskepping.
Dit is tyd om die Ministerie vir Kleinsake te sluit, wat in die drie jaar sedert dit geskep is, niks van waarde gedoen het om die sektor wat hy dien, te versterk nie. Voeg dan die Ministeries van Ekonomiese Ontwikkeling en Handel en Nywerheid saam en kry iemand wat respek het vir die konstruktiewe bydrae wat die sakesektor kan lewer, om aan die hoof daarvan te staan.
Navorsing van die Kleinsake-instituut (SBI) wat verlede week uitgereik is, wys dat 95% van ondernemings in die OESO-lande klein en mediumgroot ondernemings is, wat tot 70% van alle werkers in diens het. Hulle verteenwoordig tot 60% van die BBP.
Die SBI-navorsing lê ’n paar ongemaklike waarhede bloot oor wat werklik in dié sektor aangaan:
Suid-Afrika het minder as 250 000 klein en mediumgroot ondernemings – nie 6 miljoen soos voorheen geraam is nie. In Suid-Afrika word 56% van alle werkgeleenthede deur die land se 1 000 grootste maatskappye en die Regering geskep. Suid-Afrikaanse entrepreneurs kan tot nege dae ’n maand aan nakoming wy. Die sektor se bydrae tot werkskepping daal. Die Nasionale Ontwikkelingsplan se teiken dat kleiner ondernemings teen 2030 90% van werkgeleenthede in die land sal skep, is ’n hersenskim.