KYNOCH STEM IN TOT PROFERT-REDDING
DIT was lank net ’n gerug, maar nou is dit amptelik: Die kunsmismaatskappy Kynoch gaan die beleërde Profert oorneem.
Profert Holdings, Profert se houermaatskapppy, en ander partye het ooreenkomste bereik om die meeste van Profert se bates na Kynoch Kunsmis oor te dra, lui ’n verklaring.
Die deurvoer van die transaksie is wel nog onderhewig aan die nodige regulatoriese goedkeuring, soos deur die Mededingingskommissie.
Kynoch, ’n filiaal van die internasionale ETG-groep, is 100 jaar oud.
Hy voer kunsmis in en meng en verkoop ’n reeks kunsmisprodukte in korrel- en vloeibare formaat.
Profert, wat in 1999 gestig is, is ook ’n gevestigde menger en verspreider van korrel- en vloeibare kunsmis in Suider-Afrika.
Die beoogde samesmelting word as ’n transaksie met wedersydse voordeel beskryf, wat Kynoch in staat sal stel om ’n wyer reeks produkte te verkoop, en die maatskappy toegang tot nuwe markte en bykomende produksievermoë sal gee.
NUWE LEWE
Vir die sukkelende Profert behoort dit ’n nuwe kans op sakelewe te bied.
Dít volg nadat die Franse misstofmaatskappy Roullier einde verlede jaar finaal aangekondig het dat hy nie meer kans sien om Profert oor te neem nie, ondanks goedkeuring van die transaksie deur die Mededingingskommissie.
Roullier en sy filiaal Vitas Suid-Afrika, wat plaaslik as Timac Agro handel dryf, het destyds gesê hy het sy aanbod ná ’n jaar se onverpoosde onderhandeling teruggetrek weens “onoorkombare probleme” met die nakoming van die voorwaardes van die transaksie.
Sedertdien is hard voortgesoek na ’n koper vir Profert, veral deur die Land Bank, wat ’n aandeelhouer in die maatskappy en sy grootste finansier is.
Dit is ’n redelik ope geheim in die bedryf dat die bank al honderde miljoene rande aan ’n reddingsboei moes bestee.
Mnr. Bennie van Rooy, finansiële hoof van die Land Bank, het by navraag die voorgenome Kynoch-oorname bevestig.
‘Die bank moes al honderde miljoene rande aan ’n reddingsboei bestee.’