AGBIZ STAAN SAAM MET INTERNASIONALE KRITIEK OOR TRUMP-SUBSIDIES
DIE Cairns Group Farm Leaders, ’n groep landbou-uitvoerlande wat Suid-Afrika insluit, spreek in ’n sterk bewoorde verklaring sy diepe kommer uit oor die $12 miljard (sowat R159 miljard) wat die Amerikaanse regering gaan gebruik om sy boere te help teen die uitwerking van tariewe wat op Amerikaanse landbouprodukte ingestel is.
Dr. John Purchase, uitvoerende hoof van die landbousakekamer Agbiz, het die verklaring as Suid-Afrikaanse verteenwoordiger onderteken.
Die ander ondertekenaars verteenwoordig landbou- en voedselorganisasies van Australië, Argentinië, Brasilië, Kanada, Chili, Colombia, Nieu-Seeland, die Filippyne en Uruguay.
Luidens die verklaring sal die nuwe subsidies internasionale landboumarkte verder verwring en dié boere benadeel wat min tot geen regeringsteun ontvang nie.
Die Cairns-groep doen ’n beroep op die Amerikaanse regering om pleks van die bykomende subsidies eerder die raad van Amerikaanse landbou-organisasies te volg.
Laasgenoemde het gevra dat marktoegang vir Amerikaanse landbouprodukte herstel word.
Die organisasies wil hê die handelsoorlog, wat die begin was van die vergeldende tariewe wat Amerikaanse landbou nou benadeel, beëindig word.
“Dié handelsoorlog, wat al hoe wyer uitkring, los niks op nie en benadeel boere én verbruikers,” lui die verklaring.
BILLIKE STELSEL
Die Cairns-groep is in 1998 deur die Australiese boerefederasie (NFF) gestig.
Dit bestaan uit landbou-organisasies in die Cairns-groep van lande, ’n koalisie van landbou-uitvoerlande.
Die groep verteenwoordig boere wat meer as ’n derde van die wêreld se landbou-uitvoer produseer en beywer hom vir ’n billike en afdwingbare internasionale handelstelsel vir landbouprodukte.
Trump se plan is wyd in Amerika gekritiseer, onder meer deur sy eie party en talle produsente-organisasies.
‘Dié handelsoorlog kring al hoe wyer uit. Dit benadeel boere én verbruikers.’