SA SAK OP WÊRELD-INDEKS

HOEWEL Suid-Afrika se logistieke stelsels vergeleke met ander lande sedert 2016 op verskeie vlakke agteruitgegaan het, is dit steeds doeltreffender as dié van die meeste ontwikkelende lande.

Luidens ’n logistieke indeks wat deur die Wêreldbank bygehou word, beklee Suid-Afrika nou die 33ste plek uit 160 lande wat beoordeel is. Dit is 13 plekke swakker as die 20ste plek wat Suid-Afrika in 2016 beklee het. Duitsland beklee steeds die eerste plek, gevolg deur Swede, België en Oostenryk.

Die landbousakekamer Agbiz sê in ’n verklaring gegewe die verwagting dat Suid-Afrika groot surplusse landbouprodukte (veral mielies) vir die uitvoermark gaan hê, gaan logistieke dienste van deurslaggewende belang wees om suksesvol te

kan uitvoer.

Die indeks gaan oor die indrukke van ’n land se logistieke stelsel, en daar is etlike onderafdelings (sien die TABEL hiernaas).

Mnr. Wandile Sihlobo, hoof van landbousakenavorsing by Agbiz, sê hoewel die indeks nie spesifiek oor die landbousektor gaan nie, gee dit ’n goeie aandui- ding van die land se vermoë om groot hoeveelhede kommoditeite met die minimum onderbrekings uit te voer.

“Suid-Afrika se mielie-uitvoer in 2018-’19 kan meer as 2,5 mil- joen ton wees. Ons verwag dat vanjaar se landbou-uitvoer glad sal verloop,” sê hy.