GESOGTE 20 TON-KLUB MIK NOU VIR 30 TON
CRADOCK Saadverspreiders het vanjaar sy vyfde en laaste 20 ton-mieliekompetisie aangebied. Die wenopbrengs was 22,60 ton per hektaar wat deur mnr. Leon Scheepers van Leon Ontwikkeling van Mortimer naby Cradock behaal is.
Scheepers was die wenner in die suidelike streek. In die tweede plek was mnr. Zirk Scheepers van die plaas Wonderkop naby Cradock met 22,29 ton per hektaar. Mnr. Neels Dreyer van die plaas Glen Stuart naby Mortimer was in die derde plek met 20,93 ton per hektaar.
In die noordelike streek het mnr. Johan le Roux, ’n bestuurder by die Kroonfontein-boerdery naby Colesberg, die wenopbrengs van 20,39 ton per hektaar behaal. Mnr. Lood Engels van die plaas Adamsfontein naby Colesberg was tweede met 20 ton per hektaar en mnre. James Jordaan en Pieter Marais van Karoo Alliance naby Hofmeyr derde met 18,82 ton per hektaar.
Die kompetisie word in twee streke verdeel, aangesien die hitte-eenhede in die gebied noord van Cradock drasties verskil van die gebied suid van die dorp.
NÓG 10 TON
Mnr. Dirkie Visser, organiseerder van die kompetisie en besturende direkteur van Cradock Saadverspreiders, sê ’n 30 ton-klubkompetisie word vir aanstaande jaar beoog.
Hy meen dié nuwe mikpunt is haalbaar met hedendaagse tegnieke en harde werk.
“Toe ons die kompetisie begin het, was die verwagting dat dit baie moeilik sou wees om 20 ton per hektaar te behaal,” sê Visser, wat al byna 30 jaar lank in die ge- bied as ’n landboukundige werk.
Boere kon dit egter regkry danksy die kombinasie van die regte saad, gifstowwe en mikro-elemente vir die grondsamestelling om Cradock.
SUKSESSE
In die eerste kompetisie, in 2014, was die wenopbrengs net bo 19 ton per hektaar. Die hoogtepunt was die 23,92 ton per hek- taar wat in 2016 behaal het.
Gemiddeld 25 tot 30 deelnemers het jaarliks aan die kompetisie deelgeneem en volgens Visser was die mededinging uiters straf.
Die kompetisie word deur Agrifriend, BASF, Cradock Saad, Metson, Monsanto, Pannar Saad, Wemkem SA en Standard Bank geborg.