BEDRYF BEGIN HERSTEL NÁ DROOGTE EN VOËLGRIEP

DIE VOERBEDRYF toon tekens van herstel ná ’n besonder moeilike tyd die afgelope paar jaar.

Mnr. De Wet Boshoff, uitvoerende direkteur van die Vereniging van Veevoervervaardigers (Afma), sê Afma se voerverkope vir die boekjaar 2017-’18 toon ’n daling van slegs 0,7%. Dit vergelyk gunstig met die reusedaling van 6,2% in die vorige boekjaar.

Laasgenoemde was persentasiegewys die grootste daling in die geskiedenis vir Afma-lede en kan toegeskryf word aan die probleme in die lewendehawe- en pluimveebedryf.

Boshoff sê die pluimveebedryf moes goedkoop ingevoerde hoen- dervleis en voëlgriep die hoof bied, terwyl die skaap- en beesbedryf deur die droogte getref is.

Hy sê die goedkoop ingevoerde hoendervleis bestaan uit produkte uit die Europese Unie (weens die vryehandelbepalings van die Ekonomiese Vennootskapsooreenkoms), ’n kwota Amerikaanse hoenderstukke (wat Suid-Afrika kragtens die Amerikaanse wet op groei en geleenthede, Agoa, sonder teenstortingstariewe kan binnekom) en sedert die tweede helfte van verlede jaar ál meer gestorte produkte uit Brasilië.

VOËLGRIEP

“Asof die probleme in die han-

delsarena nie genoeg was nie, is die pluimveebedryf ook deur dodelike voëlgriep getref. Groot getalle hoenders moes in die boekjaar 2016-’17 van kant gemaak word,” sê hy.

Afma-voerverkope in die lêhenbedryf was in die afgelope boekjaar, van April 2017 tot Maart 2018, 4,4% laer. In die vorige boekjaar het dit met 6,9% gedaal.

Boshoff skryf die dalings geheel en al aan voëlgriep toe. “Ons verwag ’n volledige herstel van verlore volume teen die einde van die volgende boekjaar mits Suid-Afrika in dié tydperk vry van voëlgriep kan bly.”

Hy skryf die daling in voerverkope in die braai- en teelhoenderbedryf aan voëlgriep én invoer toe. Voerverkope in die braaihoenderbedryf het van 2016-’17 tot 2017-’18 met 2,6% gedaal, vergeleke met ’n daling van 5,5% in die vorige boekjaar.

In die teelhoenderbedryf het dit ná ’n daling van 6,2% van 2015-’16 tot 2016-’17 in die afgelope boekjaar met 1,9% gegroei.

“Hoewel ons (in dié twee sektore) volledige herstel van die gevolge van voëlgriep verwag, sal die invoer van goedkoop hoendervleis ’n nadelige invloed bly hê.”

Boshoff sê die voerbedryf wag nou op die aanbevelings van die spesiale taakspan wat die Regering laat in 2016 aangestel het om oplossings vir die pluimveebedryf se probleme te vind. “As hierdie aanbevelings toegepas word, sal dit nie net tot voordeel van die voersektor strek nie, maar ook die hele graan- en oliesadewaardeketting van Suid-Afrika.”