NEEM BETER BOERDERYBESLUITE MET DIE REGTE DATA
Toegang tot die regte data op die regte tyd lewer ’n reusebydrae tot boere se besluite. Agri Technovation (AT), met die samewerking van Mezzanine, ’n filiaalmaatskappy van Vodacom wat digitale en Internet van Dinge-oplossings vir Afrika ontwikkel, wil dié soort data in elke boer in Suid-Afrika en die res van die vasteland se hande sit.
Die maatskappye se vennootskap dek AT se MyFarmWeb-platform, wat boere toegang bied tot ’n magdom inligting uit verskeie bronne, saamgevat in ’n wolk.
AT se MyFarmApp-slimfoontoepassing is die sleutel tot al die strome landbouverwante data wat by die platform ingevoer word. Dié data kom onder meer van presisieboerderysensors en eindverbruikergegenereerde data.
“Presisieboerdery, wat ook as die vierde landbourevolusie bekend staan, is datagedrewe, met die doel om boere se daaglikse besluitnemingspro- ses te verbeter, wat doeltreffendheid voortstu,” sê mnr. Jacques de Vos, uitvoerende hoof van Mezzanine.
“Die vennootskap met Mezzanine sal MyFarmWeb-gebruikers toegang gee tot die magdom sensors op plase wat data insluit oor voertuig-opsporing en veiligheid, grondvog en -temperatuur, mikroklimate en weerstoestande, watervloei en reservoirvlakke, oesopbrengsmeting en -gehalte, brandstofvoorraad en die verbruik van ander produksiemiddele, asook die verwante voordele en insigte,” sê mnr. Erik de Vries, uitvoerende direkteur van AT.
Meer as 2 700 boerderye in Suid-Afrika en elders gebruik reeds die MyFarmWeb-stelsel, wat plaaslik deur Laeveld Agrochem en Farmers Agri-Care in KwaZulu-Natal versprei word.