MIELIEPRYSE LAER WEENS GROOT VOORRAAD, GOEIE OESTE
Met sowat 45% van van die nasionale mielieoes wat reeds in die eerste 11 weke van die bemarkingsjaar 2018-‘19 aan silo’s gelewer is, blyk vanjaar se verwagtinge vir Suid-Afrika se mielie-oes baie goed te wees, sê mnr. Wandile Sihlobo, senior ekonoom van die landbousakekamer Agbiz. “Die belangrikste somergewasse, soos mielies en sojabone, is in ’n goeie toestand.”
Volgens hom kan die land se mielievoorraad soveel as 16,7 miljoen ton wees, wat sowat 6 miljoen ton hoër is as die plaaslike vraag.
Sihlobo waarsku egter dat die hoër pryse in Chicago slegs ’n opflikkering kan wees, aangesien die weer in die Amerikaanse Middeweste rooskleurig lyk. “Inligting vanaf die Amerikaanse departement van landbou wys dat 72% van die Amerikaanse mielie-oes as goed of uitstekend beskou word. Dit word onderskryf deur die goeie weerstoestande.”
Die Amerikaanse oes kan na verwagting met 3% krimp teenoor die vorige jaar tot 361 miljoen ton. Die rede daarvoor is grootliks kleiner aanplantings.
“Die internasionale mielie-oes sal na verwagting net meer as 1 miljard ton wees – meer as 2% hoër as verlede jaar. Daar is egter ook ’n styging in mielieverbruik wêreldwyd,” volgens Sihlobo.
Dié situasie kan slegs ’n klein invloed op die plaaslike mieliemark hê. Dit word tans deur plaaslike faktore gedryf, aangesien Suid-Afrika weer ’n netto uitvoerder van mielies is.