GOEIE VRAAG NA RAS NÁ DROOGTE
Die vooruitsigte vir die SA Vleismerino skaapras lyk heelwat beter as die ooreenstemmende tyd verlede jaar. Mnr. Jan Vosloo, rasdirekteur van die SA Vleismerino-genootskap, sê vergeleke met hierdie tyd verlede jaar is rampryse vanjaar sowat 30% hoër, terwyl ooipryse met net meer as 40% gestyg het.
“Die skaapbedryf is in ’n goeie posisie namate die wol- en vleisprys goeie beweging toon. Vir die SA Vleismerino, ’n dubbeldoelras, is dit goeie nuus, want dit beïnvloed ook die pryse gunstig. Boonop is lampryse goed, met lammers wat tans teen meer as R50/kg verkoop word.”
Vosloo skryf ook die styging in pryse toe aan ’n heropbouaksie nadat die droogte groot dele van die tradisionele skaapboerdery-gebiede in Suid-Afrika lamgelê het.
“Die droogte het verwoesting gesaai, veral in die Oos- en WesKaap wat tradisioneel sterk in die skaapbedryf gevestig is. Van hierdie streke se boere is egter weer besig om hul kuddes te herbou ná vanjaar se beter toestande.
“Die Swartland is nog onder druk, maar daar is darem ook die vooruitsigte van ’n oes op die lande, wat tot optimisme lei,” sê hy.
Die telersgenootskap se 62ste nasionale veiling is op 1 Augustus gehou. Meer as 100 SA Vleismerinoramme en 30 jong, dragtige stoetooie is aangebied.