GrowSafe-stelsel nou in SA gebruik S
Die GrowSafe-stelsel is die nuutste tegnologie wat beskikbaar is om voerinname te meet. Die volledige stelsel is by die LNR in Pretoria geïnstalleer, waaronder ’n stelsel wat diere weeg as hulle water drink.
uid-Afrika se eerste GrowSafe-stelsel is verlede jaar by die bultoetssentrum van die Landbounavorsingsraad (LNR) se Irene-kampus geïnstalleer. Dié stelsel is gekoop onder leiding van prof. Michiel Scholtz van die LNR deur die Nasionale Navorsingstigting (NNS) se nasionale toerustingsprogram.
Navorsers kan nou makliker na beeste se individuele voerinname kyk nadat ou tegnologie vervang is met dié Kanadese stelsel wat die voeromsetting makliker en akkurater meet.
Sowat 40 jaar gelede is sogenoemde Calan-hekke by die LNR geïnstalleer om beeste se voerinname te meet.
Dié tegnologie het sedertdien vinnig verouder in die digitale era.
Die GrowSafe-stelsel is die nuutste tegnologie wat beskikbaar is om voerinname te meet. Die volledige stelsel is by die LNR geïnstalleer, waaronder ’n stelsel wat diere weeg as hulle water drink. Dus kan waterinname ook onregstreeks gemeet word.
Dit is een van die eerste installasies van dié omvattende stelsel in Afrika. Hoewel ’n stelsel deur mnre. Mecki Schneider en Ebbi Fischer in Namibië geïnstalleer is, sluit dit nie die bykomende liggaamsgewigstelsel in nie. Terwyl die een in Namibië ’n 8-voerbakstelsel het, het die LNR se stelsel ’n 16-voerbakstelsel. Gevolglik kan tot 160 diere gelyktydig getoets word.
Weergawes van die stelsel word reeds in agt lande gebruik, naamlik Amerika, Kanada, Australië, Brasilië, Finland, Mexiko, Brittanje en Uruguay. In Amerika is reeds 45 stelsels geïnstalleer, waarvan 18 by universiteite is. Daar is ook 14 in Kanada, 4 in Brasilië en 2 in Australië.
Die LNR wil die stelsel gebruik om jong bulle se prestasie te toets. Met die GrowSafe-stelsel sal hy meer diere kan toets, met beter monitering en minder menslike inmenging. Die toetslengte sal ook verkort kan word.
Residuele voerinname (RVI) én netto groeitempo (NGT) sal uit dié inligting beraam kan word. RVI is wanneer die dier minder eet, maar teen dieselfde tempo groei. NGT is waar die dier se voerinname dieselfde bly, maar dit vinniger groei.
Klimaatsverandering gaan op lang termyn groot probleme vir diereproduksie daarstel. Daarom word die uitwerking daarvan op die doeltreffendheid, groeitempo en gedragspatroon van verskillende vleisbeesgenotipes met die GrowSafe-stelsel deur die LNR nagevors.
Met dié stelsel kan beeste se voerinname en groei presies en individueel gemeet word om vas te stel watter tyd van die dag, hoeveel keer per dag en hoeveel voer elke individuele bees op ’n slag vreet. Navorsers kan ook die waterinname van die diere monitor en onregstreeks meet.
Hierdie navorsing sal meer lig werp op onsekerheid oor die uitwerking van hitte op beeste se voer- en waterinname en hul groei. Dit sal ook help om te bepaal watter rasse die beste in warm toestande presteer.
Klimaatsverandering gaan op lang termyn groot probleme vir diereproduksie daarstel. Daarom word die uitwerking daarvan deur die LNR nagevors.