SWART ANGUSBUL TEEN REKORDPRYS VERKOOP
Uitstekende pryse wat onlangs vir Angus-teeldiere op veilings in die Vrystaat en die Wes-Kaap betaal is, is ’n aanduiding van ’n groeiende vraag na Angus-teelmateriaal.
Mnr. John Boulle, rasdirekteur van die Suid-Afrikaanse Angus-beestelersgenootskap, sê ’n swart Angusbul, De Panne International No. 1, DE 15-13, is vir die rekordprys van R150 000 verkoop op Prestige Angus (De Panne-, Spoor- en Boschendal-stoetery) se onlangse veiling op Moorreesburg in die Wes-Kaap.
Volgens Boulle is die bul verlede jaar as die kampioenbulkalf en grootkampioenbul op die nasionale Anguskampioenskap in Bloemfontein aangewys. Die bul is deur mnre. Jaco Smit van Black Mamba Angus by Moorreesburg en Paul Coetzee van Invermooi Angus by Mooirivier in KwaZulu-Natal gekoop. Smit sê Taurus Evolution sal die bemarking van die bul se semen behartig.
Op dieselfde veiling is ’n swart Angusvers, De Panne Jewel 9, DE 16-22, vir R80 000 verkoop. Die vers is dragtig van De Panne International No. 1, DE 15-13 en in uitstekende kondisie, sê Boulle. Mnr. Kobus Delport van Makojalo Angus by Potchefstroom het die vers gekoop.
“’n Bestendige vraag en uitstekende pryse op die onlangse veilings is ’n aanduiding van ’n groeiende vraag na top-Angusbeeste,” sê Boulle. Van die diere wat onlangs verkoop is, is na Namibië, Botswana en Zimbabwe uitgevoer. “Die Suid-Afrikaanse Angus-telersgenootskap kan waarlik trots wees op sy telers van dié Suid-Afrikaanse produk,” sê Boulle.