‘PERFEKTE STORM’ TREF AVOKADOBEDRYF
SUID-AFRIKA se avokadouitvoer gaan gebuk onder lae pryse te midde van ’n rekord-oes en sterk mededinging uit ander avokadoproduserende lande in die Suidelike Halfrond, veral Peru.
Die eerste 18 tot 20 weke van die uitvoerseisoen het goeie pryse op die Europese mark gelewer, maar daarna het die lewering uit Suid-Afrika ’n hoogtepunt bereik met 800 000 tot 900 000 kartonhouers van 4 kg elk per week.
Peru se uitvoerseisoen het terselfdertyd sy hoogtepunt bereik en dié land het 2,8 miljoen tot 3 miljoen kartonhouers per week gelewer.
“Die ooraanbod op die Europese mark het swakker pryse tot gevolg gehad. Voorrade het begin opbou en moes goedkoper verkoop word om dit weggewerk te kry,” sê mnr. Derek Donkin, uitvoerende hoof van Subtrop, die sambreelliggaam vir subtropiese gewasse.
In een stadium, tussen week 20 en 27, was daar 4 miljoen kartonhouers in die Europese mark, waar daar gewoonlik ongeveer 3 miljoen kartonhouers per week verkoop word.
KLIMAAT
Donkin sê die ooraanbod is te wyte aan optimale klimaatstoestande tydens vrugset in die lente van verlede jaar in Suid-Afrika én Peru. Peru se oes is byvoorbeeld 20% groter as in 2017, en Suid-Afrika het ná die droogte byna 80% meer avokado’s as verlede jaar.
“Dis ’n ‘perfekte storm’ wat ons kwekers getref het,” sê Donkin. Dit lyk egter of pryse nou weer sal verstewig, sê hy, veral vir groenskilkultivars waarna daar nou ’n vraag is.
Peru het ook nou baie van sy oes na ander markte, soos Amerika en China, gekanaliseer. Daar is dus minder druk op die Europese mark, wat Suid-Afrika se hoofuitvoerbestemming vir avokado’s is.
Donkin sê vanjaar se swak pryse is nie noodwendig ’n nuwe neiging nie. “Namate produksie toeneem, gaan daar ook nuwe markte oop,” sê hy. Suid-Afrika kan binnekort marktoegang vir sy avo’s na Amerika en China kry, wat die geleentheid vir markontwikkeling skep.