Soja spring differensiaal vry
DAAR is reuse-geleenthede vir Suid-Afrika om sy produkte aan die ontluikende ekonomieë van die Midde-Ooste en Noord-Afrika te lewer, mits die land bly voldoen aan internasionale gesondheidstandaarde.
Dit was die mening van dr. Holger Matthey, bestuurder van mediumtermyn-vooruitskouing en markontleding by die Verenigde Nasies se Voedsel en Landbou-organisasie (VLO). Dr. Matthey was ’n spreker tydens die Buro vir Voedsel en Landboubeleid se jaarlikse bekendstelling van sy vooruitskouing.
“Die Midde-Ooste en NoordAfrika (Mona) gaan oor die volgende dekade 20% tot 30% meer voedsel benodig, wat onder meer tot 4 miljoen ton meer rooivleis, suiker en eetbare olies insluit. Dit word veroorsaak deur ’n bevolkingsaanwas van sowat 18%. Meer mense en ’n gemiddelde inkomstestyging van sowat 1,6% oor die volgende tien jaar, sal duurder produkte, soos rooivleis, binne bereik van die middel-inkomstegroep plaas,” het Matthey gesê.
Ongelukkig word die streek egter ook ontwrig deur spora- diese gevalle van konflik en politieke onbestendigheid wat voedselsekerheid in gedrang bring en markte kan ontwrig. “Slegs ’n derde van die streek is geskik vir landbou en 65% daarvan word deur bestaansboere met graan beplant, wat beteken dat slegs 15% van die oes jaarliks die mark bereik. Die streek gaan dus al hoe meer op invoer moet staatmaak om basiese voedselkommoditeite te bekom. Ons bereken dat graaninvoer na die Mona-streek teen 2027 30% van die wêreld se graanhandel sal bevat,” het Matthey gesê.
ROOIVLEIS, SUIKER EN MIELIES HET ’N MARK
Dit is veral Suid-Afrikaanse rooivleis, suiker en mielies wat die potensiaal het om na hierdie streek uitgevoer te word, terwyl die uitvoer van lemoene ook ’n groot geleentheid is. “Suid-Afrika het reeds sowat 250 000 ton lemoene van 2013 tot 2016 na die streek uitgevoer. Die mark in Noord-Afrika toon veral groot potensiaal,” het Matthey gesê, maar ook gemaan dat gevestigde uitvoerlande soos, Amerika, Brasilië en die Oekraïne, reeds ’n stewige vastrapplek in die mark het. “Suid-Afrika sal moet verseker dat sy produkstandaarde van topgehalte is en dat streng daarby gehou word om die potensiële mark in die toekoms ten volle te kan benut.”