WOLMARK BOKSPRING MET OPENING VAN NUWE SEISOEN
DIE 2018-’19-wolseisoen het op die openingsveiling met ’n galop weggespring, en het teen R238,29/kg vir skoonwol geopen. Dit is 12,4% hoër as die sluitingsprys van Cape Wools se wolaanwyser vir die 2017-’18-seisoen.
Luidens Cape Wools se markverslag was die swakker rand die hoofdryfveer vir die styging. Die volgehoue vraag na Suid-Afrikaanse Merinowol in al die lengte- en sterkte-kategorieë is nog ’n rede vir die styging.
’n Rekordprys vir vetwol is op die veiling betaal vir ’n baal BHF-wol van 17,2 mikron en ’n skoonoprengs van 74,5% van mnre. Ronald en Adrian McNaughton van die plaas Houdconstant naby Graaff-Reinet. Die makelaar was BKB en die koper was Standard Wool Suid-Afrika.
WÊRELDAANBOD KNYP
Volgens die webblad abc.net.au word verwag dat Australië, die wêreld se grootste wolprodusent, tydens die 2018-’19-wolseisoen nagenoeg 2% minder wol sal produseer weens die droogte wat die land ervaar. Dit sal verdere druk plaas op internasionale wolvlakke, wat reeds laag is.
Luidens Rabobank se verslag vir Julie oor landboukommoditeite in Australië, is die swak handelsverhouding tussen China en Amerika egter rede tot kommer vir internasionale wolpryse.
“Hoewel geen wol, kledingstukke of tekstiel deel uitmaak van die verhoogde tariewe wat Amerika op ingevoerde goedere van China geplaas het nie, hou die verhouding ’n risiko in vir handel oor die algemeen. ”
China is Suid-Afrika se grootste wolkoper en het altesaam 69% van Suid-Afrika se wol in die 2017/’18-seisoen aangekoop.