‘Land kan homself nie uit die moeilikheid onteien’
DIE ANC het na die georganiseerde landbou uitgereik om grondhervorming en die heersende kwessies in die landboubedryf te bespreek.
Mnr. Dan Kriek, voorsitter van Agri SA, het op die kongres van Vrystaat Landbou (VL) in Bloemfontein bekend gemaak dat me. Jesse Duarte, die ANC se adjunk-sekretaris-generaal, die organisasie na ’n beraad van ’n breë groep belanghebbendes genooi het. ’n Opvolggesprek met die ANC se top-ses leiers word ook beoog.
Kriek sê grondwetlike sekerheid is al wat nodig is vir die landbou, wat met sy bydrae tot die waardekettingbedrywe meer as 10% van Suid-Afrika se bruto binnelandse produk oplewer.
“Die land kan homself nie uit die moeilikheid onteien nie,” sê Kriek, wat sy kommer oor die heersende “ongesonde en irrasionele” onsekerheid oor die kwessie van grondonteiening sonder vergoeding uitgespreek het. Hy het onderneem dat Agri SA die Grondwet tot elke prys sal probeer beskerm.
Volgens hom het boere, met inbegrip van die Vrystaat, reeds die grondwetlike en morele debat van grondhervorming erken. Agri SA se regsaksie sal die ekonomie- se aspekte van grondonteiening sonder vergoeding verreken.
Een van die suksesstrategieë wat hy voorstaan, is dat die landbou help soek na oplossings en vennootskappe. ’n Voorbeeld daarvan is die Sernick-groep wat hom daarop toespits om opkomende boere te help oplei en hulle in die maatskappy se waardeketting insluit.
“Bly koelkop,” het hy boere gemaan, aangesien die georganiseerde landbou alle pogings sal aanwend om die oppergesag van die reg in stand te hou.