MEDEDINGING IN TAFELDRUIFBEDRYF KAN TAAI RAAK
SUID-AFRIKA se tafeldruifbedryf en -boere gaan in die toekoms deur veral twee faktore beïnvloed word, sê ’n internasionale tafeldruifkonsultant.
Die gebruik van nuwe kultivars wat geskik is vir tropiese en subtropiese produksiestreke, asook die bedryf se vermoë om gene te redigeer om sodoende die karaktereienskappe van vrugte te verbeter, is die twee belangrike ontwikkelings wat in die toekoms ’n toonaangewende rol in tafeldruifproduksie gaan speel. Dít is die mening van mnr. Oscar Salgado, ’n tafeldruifkonsultant van Chili wat as deel van ’n groep sprekers saam met die Suid-Afrikaanse Tafeldruifbedryf (Sati) deur Suid-Afrika reis en inligtingsdae vir boere en ander belangstellendes aanbied.
Salgado sê nuwe kultivars stel nuwe produksiestreke vir die bedryf beskikbaar. Dit stel die bedryf in staat om op ’n wyer speelveld mee te ding. “In die verlede het ons op Mediterreense produksiestreke gekonsentreer vir die verbouing van tafeldruiwe. Nou kan sekere kultivars ook in die res van die wêreld verbou word. Die produksiestreke in die Noordelike én die Suidelike Halfrond skuif al hoe nader aan die ewenaar.”
STERKER MEDEDINGING
Salgado sê Chili is reeds jare lank die wêreld se grootste produsent en uitvoerder van tafeldruiwe, maar dié land het deesdae sterk mededinging uit onder meer Indië en Brasilië.
Hy waarsku dat Suid-Afrikaanse boere hulle eersdaags in ’n soortgelyke posisie kan bevind. “Julle moet bereid wees om aan te pas om aan die veranderende vereistes van die mark en die nuwe mededingers te voldoen,” sê hy. Hy het Peru as voorbeeld gebruik, aangesien dié land – waar ’n verskeidenheid kultivars verbou word – al byna deur die hele somer in die Suidelike Halfrond vrugte kan voorsien.
Mnr. Clayton Swart, kommunikasiebestuurder by Sati, sê egter baie min lande se boere kan by Suid-Afrikaanse boere se gehalte kers vashou. “Suid-Amerikaanse lande se fitosanitêre vereistes is dalk ‘vriendeliker’ teenoor produsente, maar Suid-Afrika se streng regulasies tel hier eintlik in plaaslike boere se guns. Die gehalte van Suid-Afrikaanse tafeldruiwe is van die beste.”
Soos Peru het Suid-Afrika ook ’n langer teenwoordigheid op die mark danksy die land se uiteenlopende klimaatstreke.