Belowende jaar vir veselproduksie

VOORUITSIGTE vir die plaaslike veselmark lyk uiters belowend, met wol- en bokhaarveilings vir die nuwe bemarkingsjaar wat binnekort sal begin.

Mnr. Isak Staats, hoofbestuurder van wol en bokhaar by BKB, verwag dat die veilings in Port Elizabeth dieselfde hoë prysvlakke sal handhaaf as die hoogtepunt van die sluitingsveiling van die vorige seisoen.

Dit sal na verwagting ooreenstem met die openingsprysvlakke van die Australiese wolmark die vorige week. “Die Suid-Afrikaanse wol- mark het die vorige seisoen afgesluit teen die rekordhoogtepunt van R230/kg en sal na verwagting die nuwe seisoen op dieselfde hoë prysvlakke begin,” sê hy.

Bydraende redes vir dié verwagting is ’n afname van sowat 8% in die Australiese wolproduksie wat deur ’n heersende droogte vererger word.

“Die plaaslike wolproduksie het die afgelope tyd toegeneem en wol is wêreldwyd in aanvraag,” sê Staats. “Ons mark het die vorige bemarkingstyd in Junie 6% laer afgesluit as die voorafgaande jaar en op die huidige tydstip lyk dit asof die plaaslike produksie aansienlik hoër gaan wees nadat die droogte oor ’n wye gebied gebreek is.”

Die vraag na die Suid-Afrikaanse skeersel van sowat 20 mikron met ’n stapellengte van 60-70 mm is volgens Staats baie hoog.

Nog ’n neiging van die Australiese markte wat na Suid-Afrika oorspoel, is dat ’n groter klem op vleisproduksie gelê word. “Die Australiërs neig ook nou meer na dubbeldoelskape, soos Dohne-Merino’s en gladdelyf-Merino’s.”

Volgens Staats is dit die ideale tyd om in boerdery te belê met die huidige groeiende vraag na vleis en vesel.