HET BRAHMAN GESONDER VLEIS AS ANDER RASSE?
Sal verbruikers bereid wees om méér vir beesvleis te betaal as dit ’n beter voedingswaarde as ander beesvleis het? ’n Navorser aan die Universiteit van Florida in Amerika meen dit kan die geval wees en sy het reeds beesrasse gekry wat gesonder vleis oplewer as ander rasse.
Prof. Raluca Mateescu, mede-professor in dierkunde aan die universiteit se instituut vir voedsel- en landbouwetenskappe, het in ’n artikel in die Amerikaanse landboutydskrif The Progressive Farmer haar bevindings bekend gemaak.
Sy soek maniere om die vetsuurinhoud van beesvleis te verander. “Volgens navorsing oor die afgelope dekade hou die hoeveelheid vet in die dieet nie regtig met siektes verband nie.
“Wat duideliker word, is dat slegte vette – trans- en kortlengte-versadigde vette – die risiko van koronêre hartsiektes en ander siektes verhoog, terwyl goeie vette – mono- en poli-onversadigde en langer-lengteversadigde vette – dié risiko’s verlaag. Die sleutel tot ’n gesonde dieet is nie om die totale vetinname te verlaag nie, maar om slegte vette vir goeie vette te verruil.”
Mateescu en haar navorsingskollegas het byvoorbeeld vasgestel Brahman-biefstuk bevat méér poli-onversadigde en minder versadigde vet as die Angusras. Die Brahman het 47,5% versadigde vet teenoor die Angus se 51,3%, terwyl die Brahman 6,9% poli-onversadigde vet teenoor die Angus se 4,3% het. Met hierdie vergelyking kan hulle verklaar dat die Brahman ’n gesonder bron van vleis is.
Hulle werk nou aan genetiese waardes wat boere sal help om die beeste te identifiseer wat aan sekere standaarde vir voedingkundige gesondheid voldoen sodat hulle vir gesonder beesvleis kan selekteer en dit uiteindelik bemark.
In ’n opname onder duisend mense het die navorsers vasgestel verbruikers is gewillig om R30 tot R45 per kilogram méér vir vleis te betaal as hulle oortuig is dit is gesonder.