STAATMAKERS IN MANGOBEDRYF WORD VEREER
DIE Suid-Afrikaanse Mangokwekersvereniging (SAMKV) het sy eerste Goue Mangoeerbewyse aan vier mense in die bedryf oorhandig. Hulle is vereer vir baanbrekerswerk wat hulle ten opsigte van die verbouing van die gewas gedoen het.
Mnr. Johan du Preez van die Bavaria-vrugtelandgoed by Hoedspruit is vereer vir sy jare lange toewyding in die bedryf en die verskeidenheid proewe en navorsing wat by Bavaria gedoen is.
Bavaria is ook ’n voorloper met snoeipraktyke by mango’s in Suid-Afrika en was die eerste boerdery in Suid-Afrika met EurepGAPsertifisering.
Mnr. Theunis Botha van die boerdery Lapland, Tzaneen, is vereer vir sy betrokkenheid by die produk LIMA 400 wat gebruik word om bloeiselmisvormingswamme (Fusarium mangiferae) te bestry.
Mnr. Jaco Fivaz is vereer vir die impak wat hy van die begin van sy loopbaan af op die mangobedryf gehad het. Dit was hy wat Bavaria se EurepGAP-program in werking gestel het, het Du Preez op die dinee gesê.
Me. Danielle le Lagadec, ’n voormalige senior navorser by Merensky Tegnologiese Dienste, is in haar afwesigheid vereer vir haar navorsing en die ontwikkeling van chemiese middels vir die bekamping van mangodopluis (Aulacaspis tubercularis) en die mangosnuitkewer (Sternochetus mangiferae).
Le Lagadec het intussen na Australië geëmigreer.