ONWAARSKYNLIK DAT SOJABONE SAL AFPLAT
Dit is onwaarskynlik dat SuidAfrika se sojaboonbedryf in die nabye toekoms ’n sterk afplatting sal ervaar, sê mnr. Gerhard Scholtemeijer, voorsitter van die Oliesade-advieskomitee.
Die veevoerbedryf en ander verwante bedrywe wat die afgelope jaar erg geknou is, sal stelselmatig herstel wat ’n
verdere vraag na proteïen sal meebring. Daarteenoor bied die mieliebedryf en ander bedrywe nie ’n alternatief nie. Die sojabedryf verwag steeds dat vanjaar se oes van 1,5 miljoen ton ’n aanduiding is dat die bedryf stewig op koers is na ’n totale produksie van 2,5 miljoen ton op mediumtermyn.
Die uitvoer van sojabone is nog nooit ernstig aangedurf nie, hoewel uitvoer sporadies voorkom. Ekonomiese toestande is uiteraard bepalend vir uitvoer, waarvan die swak rand en handelsoorlog tussen China en Amerika enkele faktore is wat daartoe kan bydra. Wanneer die geleentheid hom voordoen, sal Suid-Afrika met gehalte en betroubaarheid moet bewys dat hy ’n plek in die internasionale mark verdien.
Wat saad en chemiese middels betref, het Suid-Afrika van die beste internasionale vennote, wat sekerlik kennis geneem het dat die sojabedryf nou toestemming van die Regering ontvang het vir ’n teling- en tegnologieheffing wat in die volgende seisoen ’n aanvang sal neem. Nuwe en beter tegnologie sal ongetwyfeld koste verlaag, bruto winsmarges verhoog en tot verdere voordele vir die sojabedryf bydra.