OMBUDSMAN GEE RAAD
Mnr. Deon van Blommestein, ombudsman vir die volhoubare energiegenootskap van Suid-Afrika (Sessa), het raad vir boere of ander mense wat ’n alternatiewe energie-installasie oorweeg.
“Die belangrikste eerste stap is om uit te vind of die maatskappy wat die toerusting voorsien, ’n lid van Sessa of ’n ander geakkrediteerde liggaam is.
“Tweedens moet die installeerder ’n opgeleide elektrisiën wees wat ná die tyd ’n sertifikaat van voldoening kan uitreik.
“Derdens, moenie net een maatskappy kry om te kwoteer nie. Met meer as een kwotasie kan jy altyd die spesifikasies van die toerusting vergelyk en ’n idee kry of die maatskappy weet waarvan hy praat.
“Ongelukkig kies baie mense net die goedkoopste opsie, maar op hierdie terrein is goedkoop dikwels duurkoop.
“Indien die boer koop by iemand wat ’n lid van Sessa is, kry hy die beskerming van die ombudsman. Alle Sessa-lede teken ’n gedragskode waaraan hulle moet voldoen, en dan het ons taamlik tande. Indien hy dit by ’n bakkiebende koop, is hy oorgelaat aan die genade en sal hy die regsproses moet volg.
“Die Wet op Verbruikersbeskerming (Wet 68 van 2008) beskerm wel die verbruiker, maar ongelukkig kos dit geld om hof toe te gaan,” sê Van Blommestein.