UITWERKING VAN GROEIHORMONE OP VLEISGEHALTE

Wat is die uitwerking van groeihormoonaanvullings op die gehalte van vleis? Heelwat navorsing is al gedoen oor die gebruik van groeibevorderaars, veral ná die fiasko met die gebruik van diëtielstilbestrol (DES) by beeste.

’n Hele klomp veilige molekules word vir die doel van groeibevordering gebruik. Hoewel dit nie regtig “groeihormone” is nie, het dit wél ’n invloed op anaboliese groei by diere.

Groeihormone as sodanig (somatomedien, IGF’s oftewel “insulin-like growth factors”) word wel by melkbeeste gebruik, met goeie resultate.

Die groeibevorderaars waarna die vraag verwys, is almal steroïedhormone wat as oor-implantate toegedien word by vee. Die middels word streng volgens voorskrif gebruik en in al die studies wat ek gelees en self gedoen het, was daar nie betekenisvolle residuvlakke in die vleis of lewer nie.

Die steroïedhormone wat dus gebruik word, word allerweë as veilig beskou (selfs in die Europese Unie) waar die meeste kritiek teen dié middels geopper is.

Beta-adrenergiese agoniste word ook gebruik, wat in dele per miljoen by voer ingemeng word en ’n baie gunstige uitwerking op spergroei het weens die energie-herverdelingseffekte wat dit op groeiende diere het. Die middels is neuro-endokriene stimulante omdat dit die effekte van epinefrien/ norepinefrien naboots. Prof. Edward Webb is adjunkdekaan van navorsing en nagraadse studie aan die fakulteit natuur- en landbouwetenskappe aan die Universiteit van Pretoria.