Nóg vernuwings by AFGRI op pad
Danksy die maatskappy se aanpasbaarheid het AFGRI oor die afgelope 95 jaar aan die voorpunt gebly met voedselproduksie en diensverskaffing aan produsente binne die landbousektor.
AFGRI vier vanjaar sy 95ste bestaansjaar. Dié maatskappy het in 1923 ontstaan nadat ’n groep boere die Oos-Transvaalse Landboukoöperasie (OTK) gestig het. Ná dekades gaan die maatskappy steeds van krag tot krag, wat daarop dui dat die maatskappy voortdurend by veranderende omstandighede kon aanpas.
“Hierdie bouwerk kon nie deur ’n enkeling gedoen word nie. Dit getuig dus van spanwerk deur verskillende groepe en individue wat ’n nasionale invloed in Suid-Afrika kon uitoefen,” het die hoofbestuurder in 1973, mnr. D.C. de Wet, gesê.
JOHN DEERE
Die OTK het vinnig gegroei deur opbergingsgeriewe en tegniese dienste aan boere in Mpumalanga te bied. In 1963 het die koöperasie ’n ooreenkoms met John Deere gesluit vir die verspreiding van sy toerusting in Afrika.
Teen 1972 was die silokapasiteit van die totale besigheid 587 700 metrieke ton. Die volgende halfeeu, vanaf 1973, het egter groot potensiaal ingehou en uiteindelik sou die maatskappy ook op internasionale vlak begin meeding. In 1988 was hy die eerste landboudienste-koöperasie wat ’n maatskappy geword het, naamlik OTK (Co-ops) Ltd. In 1996 het hy die grootste John Deere-tak in Afrika bestuur.
AFGRI
OTK het in 1996 op die JSE genoteer. In 2000 het die maatskappy ’n Safex-stoel verkry en ’n volledige verskansingoplossing aan kliënte begin bied. Die maatskappy was ook die eerste landboudienstebesigheid wat homself in ’n stad gevestig het.
In 2003 het OTK (Co-ops) Ltd se naam verander na AFGRI, ’n wêreldklas landboubesigheid wat deesdae ook ’n voetspoor in die res van Afrika en Wes-Australië het. AFGRI se struktuur het bestaan uit ’n genoteerde beheermaatskappy wat 100% van die aandele van AFGRI besit het. In 2005 is 26,77% van AFGRI aan die BBSEB-konsortium Agri Sizwe verkoop.
In Maart 2014 het AFGRI gedenoteer en ’n nuwe hoofstuk as ’n private maatskappy begin. Deesdae is AFGRI ’n lid van AGH (AFGRI Group Holdings). Hy bied ’n reeks omvattende dienste wat wissel van gesofistikeerde graanbestuur, toerusting van wêreldgehalte, finansiële dienste en bystand aan kommersiële en opkomende boere.
KENNIS EN RAAD
AFGRI se opleiding-en-ontwikkelingsprogram gebruik studiegroepe en proefterreine om nuwe tegnologie, soos presisieboerdery, te demonstreer. Mentors en landboukundiges dra praktiese inligting en kennis oor en bied insig uit jare lange ervaring. AFGRI meen opkomende boere kan die landbousektor in Suid-Afrika verander en ondersteun dus die ontwikkeling van gemeenskappe en voedselsekerheid vir almal.
“In verlede jaar se graangewasseisoen het AFGRI Grain Management 4,5 miljoen ton ontvang. Dit is die grootste ontvangste in een boekjaar. Die besigheid se markaandeel het 85% oorskry. Dit is ’n buitengewone prestasie”, sê mnr. Tinus Prinsloo, uitvoerende hoof van AFGRI.
Twee langstaande rekords is in dié seisoen verbeter met ontvangstes van 86 300 ton graan op een dag by een geleentheid, en 85 000 ton per dag op agt daaropvolgende dae.
“Dit is meer as ’n werk. Dit is ons passie en in die toekoms gaan ons boere steeds ondersteun,” sê Prinsloo.
“Ons groei saam met ons kliënte en staan hulle by met die talle kwessies waaroor hulle dikwels nie beheer het nie, soos klimaatstoestande, rente- en wis- selkoerse, kommoditeitspryse en grondhervorming.
“Die landboumaatskappy van vandag kan nie net boere ondersteun nie, maar moet ook relevant bly en voldoen aan die behoeftes van die aandeelhouer wat sy of haar opbrengs soek vir die kapitaal wat belê is. Hoe bly ons relevant vir die boer van môre? Deur aan te pas by veranderende omstandighede. Tegnologie speel hier ’n groot rol.”
FINANSIËLE DIENS
AFGRI bly aan die voorpunt van vernuwing, soos blyk uit die meer as R10 miljard se betalings wat al deur die eAccounts-platform gehanteer is. Dit is ’n sterk en dinamiese digitale kanaal wat klante bemagtig om hul besighede, finansies en beplanning op ’n betroubare en gebruikersvriendelike platform te bestuur. Die funksionaliteit sluit UNIGRO Finansiële Dienste, AFGRI Graanbestuur, GroCapital Forex/Safex en UNIGRO Versekeringsdienste in.
AFGRI is trots op die eerste AFGRI-toepassing, die AFGRI Grain App, wat op 18 Junie bekend gestel is. Met dié slimfoontoepassing kan klante hul graanlewerings intyds by al die silo’s besigtig, met ’n potensiële beperkte vertraging van 15 minute.