Behaal sukses met Agricol se sonneblom
Baie boere was in die 2017-’18-seisoen verras deur die prestasie van die kultivars in Agricol se Agsun-sonneblomreeks. Van dié boere vertel van hul sukses in verskillende boerderydistrikte.
Die 2017-’18-seisoen was een van die onvoorspelbaarstes. Ondanks uiterste klimaatstoestande het sonneblom weer bewys dit is ’n gewas wat goeie opbrengste in strawwe toestande kan realiseer. Dit kan toegeskryf word aan ’n goed ontwikkelde penwortel wat vog vanuit dieper grondlae kan onttrek.
HEILBRON
Mnr. BG Strydom van die plaas Marthinus Rust in die Heilbron-omgewing in die Vrystaat het twee van Agricol se hoëopbrengs-sonneblombasters geplant, naamlik Agsun 8251 en Agsun 5103CLP.
Die Agsun-reeks groei egalig en dit vergemaklik die stroopproses, sê mnr. Strydom. Die sonneblombasters het goeie skepelmassas en is minder toeganklik vir voëlskade as ander kultivars.
Mnr. Strydom het die afgelope seisoen moeilike toestande beleef maar desondanks ’n opbrengs van 1,9 ton/ha gerealiseer.
WOLMARANSSTAD
Mnr. André Jordaan van die Mashandi-boerdery by Wolmaransstad, Noordwes, getuig ook van Agsun 8251 se sukses. Dié baster het ondanks moeilike toestande steeds ’n gemiddelde opbrengs van 2,1 ton/ha gelewer.
Mnr. Jordaan het die afgelope seisoen Agricol se sonneblomkultivars gemeet aan ander sonneblomkultivars wat in die distrik Wolmaransstad geplant word. Sy waarneming is dat die Agsun-sonneblomreeks uitmuntende weerstand teen siektes bied. Hoewel hy vanjaar voorkomend teen Alternaria gespuit het, is daar nie naastenby die skade met swamsiektes waargeneem by die Agsun-kultivars teenoor ander kultivars wat aangeplant is nie.
Mnr. Jordaan is ook beïndruk met die kultivars se goeie opkomsvermoë en opbrengsbestendigheid.
“Agricol se sonneblom is veelsydig. Of ek dit nou vroeg of laat plant, die kultivars vaar altyd goed. Dit het altyd ’n beter skepelgewig as ander kultivars en uitstekende graangehalte.
“Die silo’s is ook baie tevrede, want dit is maklik om die monster se vreemde materiaal te verminder. Die staygreeneienskap het baie hiermee te doen. Ek sukkel nie met dowwe pitte nie,” sê hy.
OTTOSDAL EN HARTBEESFONTEIN
Mnr. Flip de Bruyn van die Hageland-boerdery tussen Hartbeesfontein en Coligny in Noordwes en sy seun, ook Flip, plant al geruime tyd Agricol se sonneblombasters. Hulle behaal groot sukses op droëlande van sowat 1 600 ha.
Die hoofaanplanting bestaan uit Agsun 8251 en ’n gemiddelde opbrengs van 2,7 ton/ha is al van dié kultivar gestroop. Dié baster se gemiddelde opbrengs op lang termyn is sowat 2 ton/ha.
Agsun 8251 se opbrengsbestendigheid in droë en nat seisoene is een van die baster se eienskappe waarvan die De Bruyns hou. Dit bevat ook die
staygreen-eienskap wat die plant beter weerstand gee teen sekere stamsiektes en verseker dat die plante ’n goeie staanvermoë het. In die Hartbeesfontein-gebied is baie duiwe en die vreetskade is aansienlik minder weens die plant se kompakte kopvorm.
BETHLEHEM
“Ek plant Agsun 8251 al vir ’n paar jaar met bestendige opbrengste,” sê mnr. Henry van der Merwe van die plaas Deelpan naby Bethlehem in die Vrystaat.
“Voordele wat die baster op my plaas laat uitstaan, is sy staanvermoë en kopgrootte wat voëlskade beperk. Dit groei ook nooit te hoog nie en dit vergemaklik stroop. Vanjaar het ek 700 ha geplant en ’n gemiddelde opbrengs van 2,2 ton/ha behaal. Ek kan Agsun 8251 beslis aanbeveel vir enige ander boer.”
SUKSES
Die sleutel vir die sukses van die komende seisoen se sonneblomaanplantings gaan op kultivarkeuse berus. Die twee belangrikste eienskappe wat onthou moet word, is opbrengsbestendigheid en siekteverdraagsaamheid. Dit speel die grootste rol by ’n kultivar se langtermynstabiliteit en die Agsun-sonneblomreeks is inderdaad sinoniem met opbrengsstabiliteit.
Mnr. Joubert Swanepoel is sonneblomgewasbestuurder by Agricol.