Senwes praat saam oor grond Avontuur roep met
Die gronddebat in Suid-Afrika bied nie antwoorde op drie van ons groot probleme nie, naamlik armoede, werkloosheid en ongelykheid. Senwes ondersteun dus Landbouweekblad en Agri SA se grondberaad, wat klem lê op oplossings.
Grondonteiening sonder vergoeding is nie ál aspek van die gronddebat nie. Die ekonomiese en finansiële stelsels wat op eiendomsreg gegrond is, moet ook beskerm word. Só verduidelik mnr. Francois Strydom, uitvoerende hoof van die Senwes-groep, dié maatskappy se betrokkenheid by
Landbouweekblad en Agri SA se grondberaad wat op 23-24 Augustus in Bela-Bela gehou word.
“Individue besit bates, soos eiendom, motors, mediese en pensioenfondse. SÓ kan hulle oor die jare heen rykdom opbou wat aan toekomstige geslagte oorgedra kan word. Dit is ’n vryemarkstelsel in aksie.
“Ek dink die geskiedenis het gewys sosialisme en kommunisme is nie volhoubaar nie. In die meeste lande waar dié stelsels gebruik is, het dit inmekaar getuimel. ’n Suksesvolle stelsel het die individu se behoefte om vir hom- of haarself te sorg, as kern. Indien die stelsel dít onderdruk, sal mense mettertyd in opstand kom,” sê Strydom.
BEMAGTIGING
Meer as 6 000 plase, wat met miljarde rande van belastingbetalers bekom is, is in regeringsbesit. Die meeste, indien nie al hierdie plase nie, is onproduktief. In gevalle waar mense wel op die plase werk, het hulle nie titelaktes nie. Dit is ’n sonde dat die Regering toegelaat het dat dit gebeur, sê Strydom.
Verder woon miljoene SuidAfrikaners op grond in dorpe en stede wat aan die Regering behoort, maar hulle bly steeds in armoedige toestande. Hulle kan nie hierdie grond gebruik om kapitaal te bekom en rykdom te skep nie, al is die grond met belastingbetalers se geld gekoop.
Die Regering het toegelaat dat miljarde rande vermors is en verdwyn het. Nou word die gronddebat gebruik om die aandag na grondeienaarskap te verskuif. Die groter probleem is nie noodwendig grondeienaarskap nie, maar individue moet bemagtig word om grond volhoubaar te gebruik om rykdom vir hulself te kan skep, sê Strydom.
“Dit is al hoe dié voortslepende armoede verbreek kan word.”
GRONDBERAAD
Op Die Grond-oplossing, ’n beraad wat deur Landbouweekblad en Agri SA aangebied word, gaan groot en kleinboere aan die woord gestel word om eenvoudige, praktiese en werkbare oplossings voor te stel waarmee volhoubaarheid verseker kan word.
Senwes ondersteun hierdie beraad omdat dit wil aantoon hoe welvaart deur grondeienaarskap en bemagtiging geskep kan word. Omdat die beraad op boere se perspektief toegespits is, sal hulle ook die kans kry om hul stem te laat hoor.
Boere reageer gewoonlik op ’n praktiese en volhoubare manier. Of die wind byvoorbeeld nou waai of nie, maak weinig verskil in die lewe van die deursnee-Suid-Afrikaner.
Maar vir boere kan die wind reën bring, sy graan droog maak en ook tot veldbrande lei. Dit is dus in sy eie belang om voorbereid te wees met praktiese en volhoubare oplossings.
BOODSKAP VAN HOOP
Strydom sê hierdie beraad is die beginpunt vir die landbou om werklik ’n verskil te maak.
“In die woorde van oudpres. Nelson Mandela moet Suid-Afrikaners ‘die meester van hul eie lot wees’. Hulle moenie vir die Regering wag om al die probleme op te los nie. Hulle moenie toelaat dat frustrasie opbou tot op die punt waar die vernietiging van openbare eiendom ’n uitlaatklep word nie,” sê Strydom.
As ’n maatskappy stel Senwes nie net in goeie finansiële resultate belang nie. Hy wil ’n gunstige verskil maak in die lewe van die sowat 120 gemeenskappe waarbinne hy sake doen. “My boodskap aan die sprekers op die beraad is om oplossings aan die hand te doen, en daardeur self die verskil te wees.”