Toyota Rush!
Die Toyota Rush, ’n nuwe voertuig in die mark vir klein sportnutsvoertuie, sal in die smaak val van enige avonturier. Die voertuig gaan enige plaaspad met gemak kan ry.
Die Toyota Rush is nie net luuks nie, maar ook gehard genoeg vir enige avontuur wat ’n stedeling wil aanpak. Danksy kontrasterende bekleedsel en chroom-insetsels op die voor- en deurpanele word die kajuit in ’n helder en aantreklike ruimte omgeskep.
’n Driespeek-leerstuurwiel met kantelwerking en afstandbeheerde skakelaars gee die bestuurder ’n stewige greep vir die pad.
Die instrumentepaneel pronk met groot, duidelik leesbare grafika met blou patrone en chroomomlystings. Die vertoonskerm in die middel, wat veelvuldige inligting vertoon, dra inligting wat self gekies kan word aan die bestuurder oor.
VEELSYDIGHEID
Padvakansies en lang ritte vereis genoeg bekerhouers en opbergruimte, en die Rush voldoen gewis daaraan. Die voorste deurhouers het plek vir twee bottels, terwyl die agterdeure ’n bekerhouer het wat in die deurhandvatsel ingebou is en deur ’n tradisionele bottelhouer aan die onderkant aangevul word. Die voertuig het twee 12 V-kragsokke, waarvan een vir die agterste insittendes beskikbaar is.
Die paneelkissie van 6,4 liter en ’n rakkie aan die bestuurder se kant bied ruimte vir persoonlike besittings. Die bagasieruimte is 609 liter groot, terwyl die Rush sitplek vir tot vyf mense bied.
Die agtersitplekke kan onafhanklik platgevou word vir meer opbergruimte.
TOERUSTING
Die Toyota Rush bied ’n uitgebreide lys toerusting, waaronder elektries verstelbare en voubare deurspieëls, ligdiodekopligte wat outomaties aan en af kan skakel, dakspore en misligte.
’n Ingeboude truratkamera en parkeerhulp (PDC) bied gerief sowel as veiligheid. Danksy ’n sleutellose stelsel met ’n toegangskakelaar aan die deurhandvatsel en aansitterknop kan die bestuurder selfs nog makliker die motor oopsluit en aanskakel.
VEILIGHEID
Die Rush pronk met omvattende en aktiewe veiligheidstelsels, waaronder voertuigstabiliteitsbeheer (VSC), sluitwerende remme (ABS) en opdraande-wegtrekhulp (HAC). Die passiewe veiligheidstelsels behels ses lugsakke wat die insittendes in die geval van ’n botsing help beskerm, asook lugsakke vir die bestuurder en voorste passasier sowel as kantlugsakke en lugsakgordyne.
ENJIN EN DRYFSTELSEL
Die Rush word deur ’n viersilinder-enjin van 1,5 liter met dubbele bonokasse aangedryf. Dié enjin se verrigtingsyfers is 77 kW teen 6 000 r/min en 136 N.m teen 4 200 r/min. Die enjin gebruik ook Toyota se VVT-i-stelsel om doeltreffendheid te bevorder.
Brandstofekonomie is ’n sterk fokuspunt van die handratweergawe wat 6,6 liter per 100 km gebruik, terwyl die outomatiese model se verbruiksyfer op 6,7 liter per 100 km te staan kom.
ONDERSTEL EN VERING
Die veerstelsel, wat die uitleg van agterwielaandrywing met die enjin voor aanvul, bestaan uit McPherson-stutte voor en ’n multiskakel-uitleg agter. Die vering is spesifiek ontwikkel om goeie dempwerk op ruwe paaie te bied en aan die vereistes op gemengde oppervlakke (teer, gruis en grond) te voldoen.
Een van die Rush se kerneienskappe is sy ruim grondvryhoogte van 220 mm, wat saam met sy invalshoek van 31 grade en vertrekhoek van 26,5 grade maklike gebruik op paaie van verskillende oppervlakke moontlik maak. Die Rush het ’n indrukwekkende waterrydiepte van 600 mm wat dié nuweling in staat stel om die meeste waterkruisings baas te raak.
INSTANDHOUDING
Die diensplan vir ses versienings of 90 000 km is standaard en word gesteun deur ’n waarborg van drie jaar/100 000 km. Prys: Vanaf R299 900.