VKB sien uit na ’n blink jaar
Die VKB Groep is ’n dinamiese landboubesigheid wat sedert sy ontstaan bykans ’n eeu gelede deurlopend daarop toegespits is om oplossings te kry vir die veranderende en uiteenlopende behoeftes van landbouprodusente en belanghebbendes in die waardeketting.
Die VKB Groep is ’n leier in die landboubedryf danksy ’n unieke samestelling van handelsmerke en produkte.
Die 2018-boekjaar was ’n besonderse jaar in VKB se geskiedenis. Die maatskappy vier volgende jaar sy 100ste bestaansjaar en wy dit in met ’n rekordjaar in vele opsigte. Die VKB Groep het die jaar afgesluit met ’n wins van R534 miljoen voor belasting.
Hierdie resultate verwesenlik VKB se strategiese doelwit waarna die afgelope aantal jare gestreef is, naamlik om R500 miljoen wins voor belasting te bereik. Die resultate is bereik ondanks die feit dat al die nywerhede nie na wens gepresteer het nie.
VKB sien egter daarna uit dat al die afdelings binne die groep hul volle potensiaal bereik.
GOEIE SYFERS
VKB Landbou het die afgelope jaar voortreflik gepresteer. Hierdie prestasie is gestimuleer deur die grootste someroes in die Suid-Afrikaanse geskiedenis.
VKB het gevolglik ook sy grootste oes nóg ontvang, wat groot logistieke probleme gebring het. Dit kon egter gehanteer word deur die tydige uitbreiding van geriewe, vernuwende planne en goeie graanbestuur. Die groot oes het ook die grondslag geskep vir die uitmuntende finansiële prestasies.
VKB se sekondêre doel is om waarde toe te voeg tot sy produsente se produkte.
In skrille kontras met die vorige jaar se swak prestasie het VKB Agri Processors (Edms.) Bpk. vanjaar goeie resultate gelewer. Die groot someroeste en gevolglik lae mielie- en sojaboonpryse baan die weg vir mededingende toestande vir VKB se nywerhede.
Grain Field Chickens (Edms.) Bpk. (GFC) het puik gepresteer en die verliese van die vorige jare is uitgewis. Die hoenderbedryf is bestendiger vergeleke met die vorige jaar, ondanks voortgesette hoë invoer.
Die prestasie is meegebring deur goedkoper produksiemiddele sowel as kontrakgroeiers se uitstekende resultate. Die vorige jaar se swak prestasie het die bestuurspan gedwing om aandag te gee aan elke klein besonderheid van die bedryf om GFC se mededingendheid te verbeter.
Die sojaboonaanleg het ook uitstekende resultate gelewer. Die aanleg se bedryfsprestasie is baie goed en die laer grondstofpryse het geleenthede gebied om teen redelike marges te pers.
Hoewel VKB se meulens beter gepresteer het as die vorige jaar, het dit nie aan die verwagtinge voldoen nie. Maalkapasiteit is in die afgelope jaar verder uitgebrei deur die toevoeging van Lydenburg Meule. Dit volg op die verkryging van die meule in Makhado (Louis Trichardt) in die vorige jaar.
Ongelukkig het die koringmeule afbreuk gedoen aan die andersins goeie prestasie van die nywerhede. Die swak prestasie is hoofsaaklik weens die Regering se gebrek aan ’n duidelike en deursigtige beleid vir die koringbedryf. VKB vertrou dat die bedryf en die Regering sal saamstaan om hierdie situasie te beredder en die bedryf se voortbestaan te verseker.
Goeie vordering is gemaak met die vestiging van die nywerhede, wat al waarde toevoeg tot wit mielies (210 000 ton), geel mielies (85 000 ton), sojabone (140 000 ton) en koring (97 000 ton). Dit dek dus die vernaamste gewasse wat in die VKB-produksiegebied verbou word.
TOEKOMSBLIK
Die afgelope jaar se prestasie onderskryf die meriete van VKB se strategie. VKB meen steeds die strategie van waardetoevoeging is die regte strategie en dat, gegewe ’n gelyke internasionale speelveld, die nywerhede in die toekoms nóg groter waarde vir VKB se aandeelhouers en produsente sal toevoeg.
Die vooruitsigte vir 2019 se boekjaar lyk uiters gunstig en aanduidings is dat groot someroeste ingesamel sal word. Sojabone en mielies lewer goeie opbrengste regdeur die VKB-gebied. Onsekerheid oor grondeienaarskap plaas egter ’n demper op beleggings in landbougrond.
Die groot someroes bied aan boere die geleentheid om hul finansiële posisie te verbeter en bied aan VKB graanvolumes wat die opbergingsvermoë kan oorskry. Dit behoort in 2019 se finansiële resultate weerspieël te word. Die laer kommoditeitspryse bied weer aan al die nywerhede die geleentheid om billike resultate te realiseer. Gevolglik word met groot verwagting na die ontplooiing van die nuwe boekjaar uitgesien.