Vele hande maak hiér ligte werk
Dit is ’n werklikheid dat die Suid-Afrikaanse platteland al hoe meer agteruitgaan. As die gemeenskap en plaaslike ondernemings egter saam inspring en help, kan nuwe lewe in vuisvoos dorpe geblaas word.
Die rol van landboumaatskappye in die opheffing van plattelandse dorpe was onlangs weer in die soeklig met NWK se deelname as primêre borg aan die South Africa Day Towns Makeover. Dié inisiatief het ten doel om vervalle dorpe in Suid-Afrika met hulpbronne en ondersteuning by te staan en te help om infrastruktuur te herbou en beleggersbelang te herstel.
“NWK het met die South Africa Day Towns Makeover-inisiatief saamgespan om Coligny in Noordwes te help,” sê mnr. Theo Rabe, uitvoerende hoof van NWK Beperk. Coligny het onlangs ongekende konflik en teëspoed beleef wat die dorp vinnig laat verval en die plaaslike inwoners verdeel het.
“South Africa Day het ingegryp en steun aan die plaaslike gemeenskap gegee. Kort daarna het die Coligny-projek ontstaan en die fokus van die Towns Makeover-inisiatief geword. NWK is trots om as vennoot aan die inisiatief deel te neem,” sê Rabe.
“Dit is vir NWK belangrik om ’n volhoubare en betekenisvolle rol te speel in die gemeenskappe wat ons as ’n besigheid bedien. Ons wil waarde toevoeg wat wyer strek as net ons eie winsgrens. NWK waardeer die goeie verhoudings wat ons met belangegroepe en gemeenskappe het,” sê Rabe.
’n Gemeenskap wat voorheen verdeel was, werk nou saam om die toekoms van hul dorp te verseker. Dié geesdrif en toewyding van die plaaslike gemeenskap, het die aandag van sake-onder- nemings buite Coligny getrek. NWK, Promac en PowerRock het almal in die Coligny-projek belê en die nodige produkte en dienste verskaf om te help om die dorp weer netjies te kry.
Dié ondernemings sê die verfraaiing van die dorp is noodsaaklik om weer ’n gevoel van trots by die plaaslike gemeenskap te kweek. Só kan die dorp ’n mededingende voordeel kry wat nodig is om potensiële beleggers te lok, werksgeleenthede te skep en die dorp se ekonomie te stabiliseer.
SKOONMAAK
Intussen het die gemeenskap van Coligny saam aan die werk gespring om slaggate reg te maak, padtekens te verf en te herstel, sakemense aan te moedig om hul winkels te verf en die terreine voor hul sakepersele te onderhou, en om rots- en blomtuine by die ingang van die dorp te skep. Die plaaslike skool se skoolterrein is skoongemaak en sommige klaskamers en geboue is ook verfraai met die samewerking van die onderwysowerheid.
Benewens die ingange na die dorp wat verfraai is, is bome aangeplant, vullis is uit die dorp verwyder en openbare geriewe opgeknap met die samewerking van die plaaslike regering. Inwoners word aangemoedig om steeds voor hul huise en ondernemings in die dorp skoon te maak en dit skoon te hou.
GEE HOOP
Die vernuwing van Coligny gaan egter nie net oor skoonmaak, verf en tuinmaak nie. Dit gaan daaroor om ’n omgewing te skep wat vir beleggers aanloklik is. South Africa Day het reeds voelers uitgesteek na potensiële mediumen langtermynbeleggers wat ’n volhoubare impak op die dorp se ekonomie sal hê deur werksgeleenthede vir die plaaslike gemeenskappe van Coligny, Scotland en Tlhabologang te skep. Lede van dié gemeenskappe het saamgewerk om hierdie inisiatief te beplan en toe te pas, en inspireer nou ander plattelandse dorpe en woongebiede om dieselfde te doen.
Die doel van die South Africa Day-inisiatief is immers om álmal te inspireer om deel te neem aan die opbou van die land en om ’n nuwe gevoel van optimisme en opwinding in Suid-Afrika en die toekoms van die land te bewerkstellig.
NWK het reeds sy waarde as ’n betroubare sakevennoot vir boere bewys en doen nou dieselfde vir die gemeenskappe waar die landbou ’n groot rol speel. “Die maatskappy het die ondervinding en kundigheid om as ’n dinamiese voorkeurvennoot in die landbou waarde toe te voeg tot die hele landbou-waardeketting,” sê Rabe.
NAVRAE: Webwerf: www.nwk.co.za