Landbou gee hoop aan die platteland
Danksy ’n hernieude klem op goeie vennootskappe met die produsent het die landboumaatskappy NWK nuwe stukrag gekry. NWK se kernbesigheid sluit in die deurlopende verbetering van klantediens en om altyd in gesonde vennootskappe met produsente, verskaffers en aandeelhouers te staan. NWK se handelbesigheid, sy graan- en finansieringsdienste is voortdurend besig met vernuwende oplossings om waarde toe te voeg tot die klant se besigheid.
NWK se bedieningsgebied in veral Noordwes het die afgelope paar jaar baie probleme getrotseer. Droogtes, swak dienslewering deur munisipaliteite en openbare betogings in plattelandse gemeenskappe het die provinsie se ekonomiese bestendigheid ’n knou toegedien.
“Dit is lekker om te sien hoe produsente ’n beter seisoen agter die rug het as twee jaar gelede toe die droogte nog so fel was. Graanverbouing het goed verloop en die sonneblomopbrengste was ook goed,” sê mnr. Johan Bezuidenhout, NWK se groepbestuurder vir korporatiewe bemarking en kommunikasie.
“Produsente en die landbousektor hou gemeenskappe hoopvol. NWK is tans ’n trotse vennoot van die Coligny skoonmaakprojek, verskeie opheffingsprojekte elders in Noordwes en verskaf hulp aan gebiede wat steeds gebuk gaan onder erge droogtes,” sê Bezuidenhout.
TRANSAKSIE
As ’n leier in die verskillende boerderygemeenskappe waar NWK betrokke is, het dié maatskappy nie geskroom om planne te maak ten bate van sy aandeelhouers nie.
Danksy strategiese oorwegings is die NWK se Opti Agri-vertakking in die finale stadium van ’n transaksie om as ’n lopende saak aan Country Bird Holdings verkoop te word. Dié onderneming, wat op kuikens en veevoer toegespits is, is ’n winsgewende sake-eenheid. Onderhewig aan die owerhede se goedkeuring vir die transaksie, sal Opti-Agri vir R296 miljoen verkoop word, sê Bezuidenhout.
VERNUWING
NWK is ook toegespits op vernuwing en tegnologie, waaronder ’n slimfoontoepassing, NWK Online, en ’n lojaliteitsprogram.
Die toepassing is ongeëwenaar wat sy intydse monitering en kennisgewings betref. Met hierdie toepassing kan die graanprodusent sy sake van sy slimfoon af dophou en vinniger besluite neem.
Die toepassing skakel by presisieboerdery in deurdat die produsent ook sy NWK-kontrakte, afleweringsrekening, opberging en dies meer dadelik en akkuraat kan monitor. Met hierdie toepassing kan produsente hul graanopbrengste fyn dophou en ook verskillende landerye se prestasies met mekaar vergelyk. Deurlopende opdatering van Safex-pryse, asook die rand se wisselkoersbeweging en kommoditeitspryse word deur die NWK-toepassing deurgegee.
Produsente wat aan NWK se lojaliteitsprogram deelneem, word met die toepassing op die hoogte gehou van hoeveel punte hulle al verdien het.
Die lojaliteitsprogram is nóg ’n voorbeeld van NWK se aandag aan vernuwing wat sy klante bevoordeel. Hoe meer sake geregistreerde klante met NWK Handel en Graan doen, hoe groter is die voordeel wat hulle verdien.
Lojaliteitspunte word verdien op aankope deur die handelsafdeling, op graanlewerings en op regstreekse transaksies, soos die aankope van kunsmis, saad en diesel. Die groep se filiale is nie deel van die program nie.
Die punte word ná die einde van die boekjaar omgeskakel na ’n randwaarde, gegrond op NWK se winsgewendheid en die volume graan wat in daardie jaar ontvang is.
“Die lojaliteitsprogram is al ’n jaar lank op dreef en R8 miljoen se waarde is toegeken,” sê Bezuidenhout.
NAVRAE: Webwerf: www.nwklojaliteit.co.za; NWK Finansiering, tel. 018 633 1000.
Met hierdie toepassing kan die graanprodusent sy sake van sy slimfoon af dophou.