Bester help veeboere met ureum
Bester Voer en Graan bestuur die voorsieningsketting van ’n wye reeks rantsoenbestanddele, waaronder voergraadureum, ’n nie-proteïengebaseerde stikstofbron vir beeste en skape.
Bester verhandel voergraad ureum wat ingevolge die Wet op Misstowwe, Veevoere, Landboumiddels en Veemiddels (Wet 36 van 1947) geregistreer is. Dit is dus geskik en veilig om in voere, lekke en konsentrate te gebruik.
Veevoerfabrieke, voerkrale, voermengsel- en lekvervaardigers gebruik ureum om voordeel te trek uit die bekostigbare voorsiening van nie-proteïengebaseerde stikstof (NPN).
Bester verkry ureum regstreeks van internasionaal geregistreerde fabrieke en verskaf die produk in 50 kg-sakke, grootmaatsakke en in los maat. Die produk kan landswyd, asook oor grense heen, na Suider-Afrika versprei word.
HOE WERK DIT?
Ureum bestaan uit 46% stikstof en word deur die bakterieë in die rumen van skape en beeste benut. Mikroörganismes wat in die rumen teenwoordig is, gebruik die ammoniak saam met die produkte van koolhidraatmetabolisme, soos mielies of melasse, om aminosure te vervaardig. Die proteïene wat uit NPN-verbindings (mikrobiese proteïen) gevorm word, het dieselfde aminosuur-samestelling as die proteïene wat tydens fermentasie vorm wanneer die primêre bron ’n natuurlike proteïen is.
Die bakterieë en protosoa is dan beskikbaar as proteïenbron wat, in kombinasie met die verbyvloeiproteïen, verder af in die spysverteringskanaal van die herkouer verteer word.
Só kan die herkouer sekere NPN-bronne gebruik in kombinasie met natuurlike proteiene om die totale balans van aminosure op verteringsvlak te voorsien.
PROTEÏENE
In die droë seisoen veroorsaak ruvoer van lae gehalte (voer met ’n proteïen-inhoud van minder as 6%) dat diere kondisie verloor. Om gewigsverlies te beperk en te verseker dat diere aan die einde van die droë seisoen in die beste moontlike kondisie is, moet diere in die winter ’n proteïenlek kry. Energie word nie noodwendig aangevul nie, maar wél proteïene omdat dit die voedingstof is wat die inname en benutting van energie aanhelp.
MAATREËLS
Ureum kan skadelik wees vir herkouers indien die nodige voorsorgmaatreëls nie getref word nie. Ureum moet in prilvorm en nie korrelvorm wees nie. Prille los vinniger in water op weens die feit dat die pril, wat soos ’n klein, ingeduikte balletjie lyk, ’n groter oppervlakte het.
Gebruik slegs ureum wat as veevoer geregistreer is omdat kunsmiskorrels dikwels skadelike stowwe bevat.
Formuleer rantsoene baie noukeurig met behulp van ’n voedingkundige. Ureum moet nie meer as ’n derde van die totale proteïen-byvoeging van daaglikse rantsoene uitmaak nie.
Die benutting van ureum benodig verteerbare energiebronne (graan en melasse), terwyl ureum die inname van aanvullings kan verhoog.
Lae vlakke ureum word beter benut met minder probleme as hoë vlakke ureum. Voer dus liewer jou diere twee keer per dag om te voorkom dat te veel ammoniak vrygestel word.
As natuurlike proteïene met ureum vervang word, verander die gehalte en die hoeveelheid minerale wat beskikbaar is in die rumenmikrobes aansienlik. Daarom moet ’n lek met bykomende vitamiene, fosfate, swawel en spoorminerale aangevul word. Die daaglikse inname van ureum sorg vir beter benutting daarvan as wanneer dit onderbroke of van tyd tot tyd beskikbaar gestel word.
KOSTEBESPARING
Bester Voer en Graan het al die produkte wat die voerbedryf en veeboer kan help om veilige lekke met ureum te meng. Ureum bied ook voordele vir melkbeeste en voerkrale, waar die doelwit hoofsaaklik kostebesparing is.
OPSOMMEND
Die gebruik en gehalte van NPN-bronne, soos ureum, word streng beheer deur veevoerwetgewing (Wet 36 van 1947 en V-nommer). Mengsels moet deur ’n geregistreerde voedingkundige gekontroleer word. Met dié voorvereistes kan ureum ’n groot bydrae lewer tot kostebesparing in lekke en voere vir herkouers.
Bester het bemarkers wat nie net ureumprille sal verskaf nie, maar ook ’n oplossing sal voorstel vir die totale voorsieningsketting van grane en voere. Persoonlike kontak en ’n langtermynverhouding bly vir Bester baie belangrik.
NAVRAE: E-pos: info@bester. co.za; webwerf: www.bester.co.za; tel. 021 809 2500.