Kennis dra by tot volhoubare toekoms
Arysta LifeScience ploeg terug in landelike gemeenskappe met bewusmakings- en opleidingsprogramme oor die veilige gebruik en toediening van landbouprodukte.
Arysta LifeScience Suid-Afrika het in Maart vanjaar met ’n mentorskapprogram vir kleinboere, Galela Kakuhle, begin. Galela Kakuhle, ’n Xhosafrase wat “korrekte/goeie toediening” beteken, is gestig in vennootskap met Umtiza Farmer’s Corp, ’n filiaal van die die Humansdorp Kooperasie. Die program bedien landelike gebiede in die Oos-Kaap.
Arysta LifeScience het in ’n doelgemaakte viertrek-opleidingsvoertuig belê wat toegerus is om opleiding aan te bied in moeilik bereikbare gebiede sonder geriewe, soos elektrisiteit.
Twee opgeleide personeellede behartig heeltyds die gratis opleiding, waaronder die veilige hantering, kalibrering en toediening van landbouchemikalieë, die interpretasie van produk-etikette, die korrekte gebruik van persoonlike, beskermende toerusting en omgewingsveiligheid.
“Mentorskap by Arysta LifeScience is ’n beproefde sakemodel en word wêreldwyd toegepas,” sê mnr. Marcel Dreyer, uitvoerende hoof van Arysta LifeScience.
“Die eerste mentorskapsprojek is in 2007 in Brasilië begin en het onlangs sy tiende bestaansjaar gevier.”
Dreyer sê die maatskappy belê in sulke programme omdat kleinboere nie die gerief van oesversekering het nie. As hul oeste misluk weens plae, onkruid of siektes, het hulle nie die middele om vir hul gesinne te sorg nie.
VEILIGHEID
Die Suid-Afrikaanse program is op veilige gebruik toegespits. Dit behels dat ’n produk op ’n veilige manier toegedien word om die beste resultate te verkry sonder om die omgewing of mense se gesondheid te benadeel.
Tweedens lê die program klem op die aanwending van die produk. Daar word seker gemaak die boer dien dit korrek toe sonder om te oorbestee en steeds die resultate te verkry ten opsigte van die bestryding van plae, onkruide en siektes.
Arysta LifeScience vorm vennootskappe met sy eindverbruikers omdat verbruikers die tasbare voordele van Arysta LifeScience se produkte ervaar. Doeltreffende oesbeskerming sal verbruikers bevoordeel deur hul besteebare inkomste te verhoog. Hulle kan dit dan gebruik om hul gesinne en gemeenskappe op te hef.
SUKSES
Sedert die program in Maart vanjaar bekend gestel is, is sowat 1 050 individue opgelei in verskeie distrikte in die Oos-Kaap, soos Mdantsane, Fort Cox, Alice, Keiskammahoek, Tsomo, Peddie, Adelaide, Mbashe, Stutterheim, Umtata, Mqanduli, Whittlesea en Balfour.
Die departement van landelike ontwikkeling en grondhervorming ondersteun die program. Die eregas by die bekendstelling was mnr. Mlibo Qoboshiyane, die LUR van die Oos-Kaapse departement van landelike ontwikkeling en grondhervorming. Sowat 550 genooide gaste, waaronder afgevaardigdes van verskeie regerings- en munisipale departemente, het die bekendstelling by die Oos-Londense Internasionale Konferensiesentrum bygewoon.
Qoboshiyane het die Galela Kakuhle-inisiatief verwelkom en gesê dit sal die werk van die departement se voorligtingsbeamptes ondersteun.
HOOP VIR DIE TOEKOMS
Mnr. Danie Marais, bemarkingsbestuurder van Arysta LifeScience, sê hulle is baie trots op die resultate van die Galela Kakuhle-program.
“Dit is merkwaardig hoeveel individue al deur die program bereik is en hoe die kennis wat oorgedra word mense se lewensen landboupraktyke verryk.
“Mentorskap in aksie sal ’n gesonde, volhoubare toekoms en goeie oesopbrengs help meebring.” NAVRAE: Webwerf: www.arystalifescience.co.za; tel. 031 514 5600.