Monitor besproeiing wêreldwyd
Die distrik Vaalharts in die Noord-Kaap het verlede jaar Toyota SA en Agri SA se Jongboer van die Jaar opgelewer. Die wenner vertel hoe presisieboerdery en beter besproeiingbestuur hom gehelp het om dié titel te wen.
Toyota SA en Agri SA se Jongboer van die Jaar vir 2017, mnr. Jaco Strauss, boer met verskeie graangewasse, soos koring, mielies en hawer, grondbone en sojabone, lusern, katoen en ook pekanneute onder die vaandel van McStrauss-boerdery.
Strauss doen ’n lang lys van dinge reg op sy plaas Lekkerkry. Hy glo aan deurlopende verbetering en daarom is Lindsay Africa se Zimmatic-spilpunte vir hom die ideale besproeiingsoplossing.
“Dit is aan die voorpunt van tegnologie en ek kan die besproeiing op my plaas van enige plek ter wêreld af monitor,” sê hy.
Strauss is besig met ’n eksperiment waarin hy die besproeiing van ’n land wat 40 km ver weg is, alleen bestuur.
“Dit is ’n gidsprojek om te sien hoe min hande nodig is om besproeiing doeltreffend te bestuur sonder om opbrengs in te boet. Met die FieldNet-stelsel van Lindsay, wat die Zimmatic-spilpunte se afstandsbestuur en presisietoediening moontlik maak, is ek opgewonde oor die resultate.”
Die McStrauss-boerdery boer tans op 721 ha waarvan 143 ha huurgrond is. Die boerdery word as ’n eenmansaak bedryf, maar die eiendomme waarop geboer word, behoort aan Strauss en twee trusts.
Graan, katoen en grondbone vorm die ankers in sy wisselboustelsel. Hy haal elke twee jaar drie oeste van die land af.
Pekanneute word op 120 ha verbou. Sy pekanneutboorde, wat hoofsaaklik op die uitvalhoeke tussen besproeiingslande staan, is uiters winsgewend en deel van sy diversifikasieplan. Dié bome kry drupbesproeiing.
Dit reën maar min. Die gemiddelde jaarlikse reënval op Strauss se plaas is sowat 350 mm. In die drupbesproeiingstelsel help bykomende tegnologie, soos grondvogmeters, om die behoefte aan besproeiing in die boorde te bepaal.
TEGNOLOGIE
Strauss lê klem op verbeterde boerderypraktyke en tegnologie om sy opbrengs per hektaar te verhoog. Hy benut die raamwerk van GWK se stelsel vir hoëtegnologieboerdery wat ’n holistiese benadering tot die landbou en tegnologie volg.
Die Zimmatic-besproeiingstelsel skakel ideaal daarby in. Hy dien byvoorbeeld vloeibare kunsmis in presiese hoeveelhede deur besproeiing toe.
Strauss sê die Zimmatic-spilpunte is elke sent werd omdat hy so presies daarmee kan werk en bykans elke druppel se doeltreffendheid kan monitor.
“Die spilpunte kan tot op elke graad presies werk. Verstellings en monitering op 360 punte is dus moontlik. Die stelsel laat weet my en die persoon aan diens op ons fone wanneer dit aan- of afskakel of as daar probleme is.
“Die windsterkte, temperatuur, waterdruk, volume en damvlakke is van die inligting wat ons kry. Die outomatisering van die stelsel help om in sekere omstandighede die spilpunt self af te skakel, soos wanneer dit te koud of winderig is. ’n Weerstasie van FieldNet skakel daarby in en só word my spilpunte volledige bestuurstelsels op elke land. Daar is 22 FieldNet-stasies wat elkeen 30-50 ha se lande help bestuur op ’n verskeidenheid Zimmatic- en ander soort spilpunte.
“Sodra toestande weer gunstig is, sal die spilpunt self aanskakel en die siklus voltooi.
“Ongeag van waar ek in die wêreld is, weet ek as probleme opduik, soos verstoppings, lekkasies of ’n kragonderbreking. Dit gee vir my vryheid, spaar tyd en help my om die boerdery meer volhoubaar te bestuur.”
NAVRAE: Webwerf: www. lindsayafricagb.com; mnr. Frederik Nel van Lindsay Africa, tel. 021 986 8900, sel 072 5177581; mnr. Jaco Strauss, e-pos: jaco.strauss@icloud. com, sel 082 414 7980.