DIÉ PRODUKTE MISLEI BOERE
Die artikel “Hou jou oog op die winsbal” (LBW, 29 Junie 2018) deur dr. Gawie du Toit en die brief “Vermy oorbemesting” van dr. S.F. du Plessis (LBW ,10 Augustus 2018) het betrekking.
Dit wil lyk of die aanbevelings vir misstowwe nie deur optimale wins vir die boer aangevuur word, maar deur die verkope van kunsmis. Ek stem daarmee saam.
Ek wil graag ’n stuiwer in die armbeurs gooi deur die talle “nuwe middels” wat byna “wondere verrig” wat op die mark beskikbaar is, by te voeg.
Hierdie produkte word bekend gestel deur kleurvolle pamflette wat groot woorde bevat. Die beskrywings klink so wetenskaplik vir die leek. Ek wil graag enkeles aanhaal.
In ’n advertensie oor kalk word gesê dat die kalsium in die “ioniese, kolloïdale, metaaliese (sic) en kovalente soorte” in die produkte beskikbaar is. Daarom is dit moontlik dat gramme van die produk pleks van tonne per ha toegedien kan word.
Om suur grond te behandel, is dus OH--ione nodig. Hierdie ione kom van karbonate, hidrosiede en selfs silikate af.
Na my wete is 17 gram hidroksiel-ione (OH-) nodig om een gram protone of suur-ione (H+) te neutraliseer, ongeag waar die OH--ione vandaan kom. Dit is tog ’n chemiese feit! As die grond dus 500 kg OH--ione (vanaf kalsium- en/of magnesiumkarbonaat) per ha nodig het vanweë die hoeveelheid suur-ione, kan dit nie chemies geregverdig word om net 20 kg van ’n produk toe te dien nie, al is die produk
100% OH--ione, wat chemies onmoontlik is. Waar gaan die ander OH--ione vandaan kom?
Die tweede voorbeeld het met blaarvoeding te doen. Om die konsentrasie van byvoorbeeld sink in sitrusblare met 25 mg Zn per kg droë blare te verhoog, moet minstens 25 mg Zn per elke kg droë blare toegedien word. Dan is dit mos onsinnig om te dink dat 10 mg Zn dié verhoging sal bewerkstellig. Tog is daar talle blaarvoedingsformulasies wat ná verdunning (volgens die etiket) nie die vereiste gewig kan lewer nie.
Onafhanklike proewe en waarnemings die afgelope 40 jaar toon dat die doeltreffendheid van blaarbespuitings net 40% tot 50% is (ureum uitgesluit). Die heel doeltreffendste draers van blaarvoedingstowwe is die anorganiese nitraat- en sulfaat-ione (met die chelate ’n hele paar treë agter).
My waarnemings, wat deur baie proewe gerugsteun word, toon as blaarvoedingstowwe teen die konsentrasie onder “Bewese” in die TABEL aan sitrusbome toegedien word, word die beste resultate (koste ingesluit) behaal. In die tabel vergelyk ek die bewese konsentrasie met die konsentrasie van die elemente wat in die spuitoplossing voorkom indien drie ander formulasies volgens voorskrif verdun word. Hoe op aarde kan gesê word dat die produkte A en B enigsins sink bevat?