Verhoudinge in SA kan ‘ontspoor’ oor giftige onteieningsdebat
DIE huidige openbare gesprek oor grondonteiening rig baie skade aan en kan verhoudinge in Suid-Afrika in die aanloop tot die 2019-verkiesing laat ontspoor, waarsku me. Melanie Verwoerd, politieke ontleder en voormalige Suid-Afrikaanse ambassadeur in Ierland.
Verwoerd het afgevaardigdes op Agri Noord-Kaap se kongres gemaan om nie met oorlogpraatjies laer te trek nie en te waak teen ’n denkwyse van “ons teen hulle”.
“Dit is ’n gesprek wat aan die een kant deur die EFF aangedryf word en aan die ander kant deur AfriForum. Albei groepe probeer vrees aanwakker, wat verhoudinge in die land en die moontlike oplossing van die gronddebat kan beduiwel,” sê sy.
Verwoerd voorsien dat ’n poging aangewend sal word om artikel 25 van die Grondwet aan te pas. “Soos ek dit van ANC-bronne verstaan, is dit daarop gemik om bloot die omstandighede van onteiening sonder vergoeding te verduidelik. Die omstandighede is baie beperk in die ANC se dokumente. Die onteiening van private huise, strandhuise en produktiewe plase wat wettiglik verkry is, is uitgesluit.”
Mnr. Norman Shushu, NoordKaapse LUR vir landbou, het in sy huldeblyk aan mnr. Henk van Wyk, die ontslape voorsitter van Agri Noord-Kaap, die Regering se versekering herhaal dat geen grondbesetting toegelaat sal word nie.
Volgens Shushu sal die vaste onderneming van die NoordKaapse regering om ’n stabiele landboubedryf te ondersteun, in toekomstige samesprekings met die nuwe leiers van Agri NoordKaap voortgesit word.