TELKOM TJOEPSTIL OOR SY PLANNE VIR DIE PLATTELAND

NOORD-KAAPSE boere wie se Telkomlyne vroeër vanjaar tydelik afgesny is, wag steeds op inligting van Telkom oor wat met hul landlyne gaan gebeur.

Mnr. Nicol Jansen, voorsitter van Agri Noord-Kaap, sê Telkom is “baie stil” oor sy planne vir plattelandse telefoonlyne.

“Ons het ook lanklaas klagtes van lede gekry dat hul landlyne afgesny word.”

Dit volg nadat wyle mnr. Henk van Wyk, voormalige voorsitter van die organisasie, vroeër vanjaar talle klagtes ontvang het oor Telkom-telefoonlyne wat in die Noord-Kaap afgesny word. In Februarie vanjaar is die landlyne van 70 boere by Garies afgesny sonder dat hulle enige kennisgewings ontvang het.

Ander boere het kennisgewings ontvang, en Telkom het aangedui dat satellietfone met selfoonsimkaarte as alternatief aangebied sou word. Die boere se landlyne is egter afgesny voor hulle verdere inligting oor die betrokke telefone van Telkom ontvang het. Die satelliettelefone is in baie gevalle nie vir boere ’n uitweg nie weens swak selfoonseine op plase.

Dr. Requier Wait, hoof van ekonomie en handel by Agri SA, het in Februarie met Open Serve, Telkom se diensverskaffer, vergader en van die telefoonlyne wat afgesny is, is weer aangeskakel.

OOREENKOMS

Wait sê Telkom is besig om landlyndienste met koordlose en satelliet-opsies te vervang omdat die landlyntegnologie verouderd is en maklik gesteel word.

Telkom het onlangs gesê die Onafhanklike Kommunikasieowerheid van Suid-Afrika (Okosa) se konsepregulasies sal die maatskappy hard tref. Dié regulasies stel voor dat die tarief wat netwerke van mekaar kan hef as ’n gebruiker van een netwerk ’n gebruiker van ’n ander netwerk bel, verlaag word.

Luidens ’n berig op Moneyweb (sien bit.ly/2CpLrCo) het Okosa ’n openbare konsultasieproses begin waarvolgens die tarief vir landlyne teen 2020 tot 3c gesny kan word. Dié tarief beloop tans 8c vir landlyne. Okosa stel ook laer tariewe vir selfoonoproepe voor, om mededinging in dié mark aan te moedig en om koste vir verbruikers te verlaag.

Mnr. Sipho Maseko, Telkom se uitvoerende hoof, sê so ’n verlaging kan werksverliese en die opskorting van dienste, soos openbare telefone en landlyndienste, op die platteland tot gevolg hê.

Wait sê die verlaging van tariewe deur Okosa en moontlike opskorting van landlyndienste versterk die saak vir landelike gebruikers om na die gebruik van nuwe tegnologie oor te skakel. “Agri SA is besig om ’n ooreenkoms met Telkom te sluit om die oorskakeling na koordlose en satellietdienste te bevorder.”

–