GARSBOERE BETREUR KOPER SE SKRAPSE KOMMUNIKASIE
GARSBOERE in die Swartland en Overberg het AB InBev, die enigste koper van moutgars in Suid-Afrika, gevra “om sy deure oop te gooi” en met boere te praat.
Verskeie belanghebbendes in die bedryf was dit eens op ’n Nasie in Gesprek-paneelbespreking op die eerste Nampo Kaap op Bredasdorp dat beter kommunikasie tussen almal in die garsbedryf tot voordeel van die bedryf sal wees. Mnr. Gert Claassen, Graan SA-verteenwoordiger vir garsboere in die Swartland, sê regstreekse kommunikasie tussen die partye sal in almal se guns tel.
Mnr. Jurie Groenewald, ’n boer van Riviersonderend, het met Claassen saamgestem. “Niemand wil voel soos ons nou voel nie. Ons het op ’n goeie plek met SAB geëindig. Ons het reguit met mekaar gepraat tot die rook soms getrek het, maar ons het gepraat, nie net e-posse en amptelike briewe ontvang en gestuur nie. Ons wil hê julle moet jul deure oopmaak en met ons praat. Dit is Afrika. Hier kan ons enigiets regkry. Ons kom tafel toe, ons wil praat.”
‘VERWELKOM GESPREK’
Op sy beurt het mnr. Josh Hammann, direkteur van landbou-ontwikkeling in Afrika by AB InBev, gesê die maatskappy verwelkom gesprekke met boere. “Ons hou daarvan om vorentoe te kyk. Dis die moeilike gesprekke wat oplossings meebring, nie die maklike gesprekke nie.”
Mnr. Erenst Pelser, uitvoerende hoof van Sentraal-Suid Koöperasie (SSK), het gesê garsproduksie bied groot struikelblokke vir produsente én maatskappye wat gars opberg. Die verskillende kultivars en grade gars wat gelewer word, moet afsonderlik opgeberg word, wat groot koste vir maatskappye tot gevolg het.
VERSEKERING BEKYK
Mnr. Jannie de Villiers, uitvoerende hoof van Graan SA, meen oesversekering kan ’n oplossing bied. Pelser het gesê plaaslike versekeringsmaatskappye het opsies ondersoek, maar sover hy verstaan, sal dié versekering ongelooflik duur wees.
Volgens Hammann werk AB InBev op ’n internasionale grondslag aan versekering vir die garsbedryf. “Ons gesels met groot versekeraars oor moontlike oplossings wat hulle kan verskaf.”
WINSGEWENDHEID
Claassen het gesê dit is belangrik dat binne die bedryf met winsgewendheid tred gehou word. “Talle boere het gars in die Swartland begin plant om uit die greep van die koringbedryf se probleme te kom. As daar nie versagtende omstandighede en ’n risikopremie is nie, gaan dit nie so vinnig ontwikkel soos wat moontlik is nie.”
Volgens Hammann het die vraag na bier in Suid-Amerika, Afrika en Asië toegeneem. “Ons het ’n nuwe brouery in Nigerië gebou en dit oorskry reeds sy produksievermoë.”
Pelser het gesê deeglike en deurlopende kommunikasie tussen al die belanghebbendes in die bedryf gaan ’n belangrike rol vervul. “Die bou van verhoudings is uiters belangrik en dit maak die bedryf uniek. Ons as mense wat graan opberg, is verbind tot die bedryf en wil deel wees van die toekoms.”
—
‘Dit is Afrika. Hier kan ons enigiets regkry. Ons kom tafel toe, ons wil praat.’