Hanteer vee met Algar
Op enige veeplaas word die belangrikste werk in krale gedoen. Daarom is goed ingerigte krale elke sent werd.
Van die belangrike gedragspatrone wat ’n veeboer moet onthou, is dat beeste slegte ervarings lank onthou. Goed ontwerpte krale maak die beeste rustig en makliker hanteerbaar. Beeste is baie gevoelig vir rowwe hantering.
Volgens gedragskenners wil diere na die plek gaan waar hulle gemaklik was. ’n Gekromde drukgang bied die valse indruk dat hulle teruggaan na daardie gerieflike plek.
Me. Carin Nortjé van Algar Veehanteringstoerusting sê dit is doeltreffender om in sirkels te werk. Dit keer dat daar “dooie” hoeke gevorm word waarin die diere bly maal pleks van om vorentoe te beweeg.
Die hoogte van die kraal, die wydte van die gange, die plasing van toegangshekke, die helling en oppervlak van die grond, die posisie van die kraal op die plaas en genoeg ruimte vir die vragmotors om te draai voor en om die laaibank, is nog faktore wat in ag geneem moet word.
Nortjé sê daar is nie ’n standaarduitleg vir ’n kraal nie, want elke plaas het sy eie behoeftes.
“Moenie met te veel diere op ’n slag werk nie. Dit is ook noodsaaklik om genoeg ruimte binne die houkamp te hê sodat die diere om jou kan beweeg.”
Algar se funksionele drukgange is arbeidsdoeltreffend en ontwerp om stres te beperk. Sy indrukfuik voer die beeste met ’n draaibeweging in die drukgang.
Nortjé sê die diere in die kraal word maklik senuweeagtig en kan maklik beserings opdoen as hulle nie reg behandel word nie.
Algar het ’n volledige reeks toerusting wat ’n verskeidenheid staalmediums gebruik om krale mee te bou.
NAVRAE: Me. Carin Nortjé: e-pos: carin@algar.co.za; webwerf: www.algar.co.za; sel 082 324 6256.