Stedelike landbou bied dié geleenthede
Oorweeg jy dit om die produksie van jou landbouprodukte stad toe te skuif? Die belangstelling in stedelike landbou neem wêreldwyd toe.
Die produksie van landbouprodukte en die verwerking en die verspreiding daarvan in dorpe en stede gaan toeneem. Dit sluit veral die produksie van landbouprodukte in kweekhuise, akwakultuur en binnenshuise vertikale boerderypraktyke in. Groenteproduksie op die dakke van geboue in Johannesburg is al ’n werklikheid.
Daar is verskeie bronne wat die groei in stedelike landbou wêreldwyd projekteer en dit moet versigtig hanteer word. Sommige maatskappye wat in stedelike boerdery belê het, bestaan nie meer nie of is nie meer aktief betrokke by voedselproduksie in stedelike gebiede nie.
Volgens Global Market Watch kan die wêreldmark vir vertikale boerdery in 2022 al $6 triljoen beloop. Suid-Afrika se totale bruto produksiewaarde vir primêre landbouproduksie is sowat R266 miljard. Volgens Research and Markets sal dié mark in Europa in 2023 $7,2 biljoen bereik. Die markgrootte was verlede jaar sowat $2,289 biljoen.
Die grootte van die mark vir vertikale boerdery word teen 2025 op A$9,9 biljoen gereken. Dit verteenwoordig groei van 22,4% per jaar.
As neigings in die uitbreiding van stedelike boerdery ontleed word, is die aankoopsyfers van beligting stelsels vir binnenshuise vertikale boerderye ’n akkurater aanduiding van die groei in die stedelike boerderymark. Die maatskappy Osram voorsien byvoorbeeld in 90% van die vertikale boerderybedryf se be- ligtingsbehoeftes.
Die groter ondernemings wat lid word van die organisasies vir vertikale boerdery wêreldwyd, sluit Osram, Privia, Philips en Signify in. Hulle is aktief betrokke in die tegniese subsektor van dié boerderybedryf.
Die TABEL toon dat die beraamde wêreldwye inkomste uit die tuinboubeligtingsmark verlede jaar $3,8 miljard beloop het. Na verwagting sal die mark tot in 2022 tot $17 miljard toeneem. Dit is ’n gemiddelde jaarlikse groei in verkope van 34%. Die neiging is gegrond op die verwante groei in stedelike landbou.
GROEI IN AKWAKULTUUR
Akwakultuur is nie by bogenoemde syfers ingesluit nie. Die verwagte markgroei vir akwakultuur in die wêreld behoort van 2017 tot 2022 van $523,7 miljoen tot $870,6 miljoen te groei.
Die kuns en wetenskap om optimale plantgroei te verseker, ontwikkel saam met die nuutste ontwikkelings in digitale tegnologie vir vertikale boerderye. Die toekoms van vertikale boerdery in klimaat gekontroleerde omgewings in stede is dinamies, vereis goeie konnektiwiteit en is datagedrewe.
Faktore wat die groei in stedelike boerdery aandryf, sluit onder meer die internet van dinge (IoT) in. IoT-sensors in boerderye om gewasse doeltreffender te verbou, gaan toeneem. Die inligting wat uit boerdery produksiestelsels se sensors verkry word, word in die rekenaar-“wolk” gebêre en verder ontleed om sekere aksies te aktiveer wat optimale produksie steun.
Die toename in die outomatisering van boerderystelsels en die verhoogde verbruik van groot data( bigdata ), asook voorspellings ontleding som opbrengste sodoende te verhoog, gaan die stedelike boerderymark uit die oogpunt van tegnologie verskaffers aansienlik laat toeneem.
Osram spits hom byvoorbeeld toe op navorsing om te bepaal hoe liggehalte, die hoeveelheid lig wat benodig word, en die duur daarvan plantproduksie kan optimaliseer. Die maatskappy spits hom daarop toe om tuisteskeppers van die toekoms in staat te stel om hul groente- en kruiebehoeftes self daagliks tuis te produseer.
Stedelinge het ’n groot behoefte om gesonde diëte te volg en om hul eie voedsel te kweek. Tegnologie stel hulle toenemend daartoe in staat om dit tuis in ’n beperkte ruimte self met geslote produksiestelsels te doen. Dié stelsel bespaar water, beperk die gebruik van kunsmis en skakel die gebruik van plaagdoders heeltemal uit.
VAN NASA TOT DIE HUIS...
’n Groot deel van die tegnologie het sy oorsprong by Nasa-wetenskaplikes wat al oor die afgelope paar dekades daaraan werk om die produksie van kos in klein ruimtes te optimaliseer.
Osram se ligtegnologie speel ’n groot rol in toekomstige ontwikkelings wat plantproduksie na ’n volgende vlak kan voer. Elke plantsoort het eiesoortige ligbehoeftes wat die gehalte en produksie hoeveelheid daarvan met unieke ligresepte, tegnologie en sagteware bepaal.
Die vereniging van vertikale boerdery (die AVF) is nie verteenwoordig in Suid-Afrika nie en wil hom hier vestig.
Die vereniging moedig vertikale boere aan om die bedryf in Suid-Afrika meer georganiseerd te maak om hierdie sektor se belange te dien.
Vertikale boerdery is nie aan boere in Suid-Afrika onbekend nie. Dit blyk egter dat stedelinge oorweeg om vertikale boerderypraktyke deeltyds aan te pak omdat die beleggings moontlikhede en die tegnologie hulle in staat stel om ’n sukses daarvan te maak.
Daar is ’n nuwe geslag stedelike boere wat vertikale stelsels begin implementeer, op kantoorgeboue in die stad voedsel kweek en die varswater visbedryf betree.
Dié boere is naby markte en spits hulle toe op hoë waarde-intensiewe produksiestelsels.
Moet dus nie die geleentheid miskyk nie.