Werk maklik met dié nuwe rondebaler
Massey Ferguson het sy hooimaakreeks uitgebrei met ’n stamboekbaler. Boere kan dus op ’n Massey Ferguson-pakket, wat vierkanten blokbalers, tolsnyers, hooilugters en kragharke insluit, vertrou.
Verlede Oktober is Lely se voermaakafdeling (wat Welger insluit) deur AGCO, Massey Ferguson se vervaardiger, verkry.
Die reeks RB-rondebalers bestaan uit vyf modelle met vaste of veranderlike kamers vir die baal van gehaltehooi, -kuilvoer en -strooi oor die hele spektrum.
Daar is drie vastekamer-modelle: die intreevlak- MF RB 1125F, die MF RB 2125F en die swaardiensMF RP 2125F. Dié balers maak bale met ’n deursnee van 1,25 m. Die 18 PowerGrip-staalrollers en vinnige baalrotasie lewer kompakte, eenvormige bale.
Die reeks bied ook twee modelle met veranderlike baalkamers – die MF RB 4160V en MF RB 4180V, wat bale van 0,9 m tot 1,6 m of 1,8 m in deursnee en tot 800 kg maak. Vier naatlose dubbellaagbelde verseker duursame werkverrigting teen hoë snelhede.
Kenmerke van die reeks sluit in ’n opteller sonder ’n nokbaan
(camless pickup) wat die gladde invoer van materiaal verseker. Danksy vyf rye tande, wat 64 mm uit mekaar gespasieer is, kan materiaal egalig en skoon opgetel word. ’n Xtracut-funksie met 13, 17 of 25 snylemme, na gelang van die model, is beskikbaar waarmee hooi fyner gekerf kan word. Die lemme is die langste op die mark en geen materiaal word oorgeslaan nie.
Om produktiwiteit verder te verhoog, kan groter balers met ’n Hydroflex-beheerstelsel verskaf word. As die invoervolume baie groot is, sak die plaat agter die opteller outomaties om materiaal deur te laat en verstoppings te voorkom. Groot verstoppings word verwyder deur die agterste vloer van die baalkamer hidroulies uit die kajuit te laat sak.
Alle modelle het ’n Powersplitratkas wat aandrywing tussen die baalkamer en die rotor verdeel. Dit verlaag die kragvereiste en bied gladder werkverrigting.
Outomatiese smering verleng ook die lewe van kettings en verminder onderhoud. Geen roller hoef ook uit die baler gehaal te word om ’n laer te vervang nie.
Na gelang van model is die balers beskikbaar met net, of met tou én net. Die beproefde Varionet-bindstelsel hanteer enige tipe net en draai bale perfek toe.
Die reeks word plaaslik deur BHBW versprei.
NAVRAE: Mnr. Theo Pieterse, e-pos: tpieterse@bhbw.co.za, tel. 011 898 0440.