STEL DIE WAARHEID BO POLITIES KORREKTE OPTREDE
Die georganiseerde landbou moet ’n armlengte wegstaan van die Regering. Jou arm kan in sy potjie afgedraai word. Vra die kommersiële boere-unie (CFU) van Zimbabwe. Jy word ’n speelbal in ’n politieke spel waar slegs stemme tel en nie ekonomiese bydrae nie. In oudpres. Robert Mugabe se woorde: “If that is what we need to get rid of them, so be it.”
Valse stellings, soos “julle het die grond gesteel”, moenie ontwyk word met “ons besef ons het ’n moeilike verlede” nie.
Besproeiingsprojekte, soos die Boegoebergdam in die NoordKaap, is in die 1930’s met uitsluitlik wit hande-arbeid voltooi. Selfs wit kinders het ná skool kom help.
Manie verwys in LBW van 7 September 2018 na die geskater van Agri Noord-Kaap-kongresgangers oor die berugtheid van “Verwoerd” en “Zuma”. Eersgenoemde het in ’n sanksie-era die ekonomie bestuur tot meer as 6% groei per jaar (die hele Suider-Afrika het daarby baat gevind). Hy was uiters streng op uitgawes. Party-funksies is nie staatsfunksies nie, was sy leuse.
Die ANC-regering is nie te vertrou met landboubelange nie. Die vinnige gelukwensing van Agri SA vir sy kritiek op AfriForum lyk verdag. As strategiese vennoot is Agri SA tydens onderhandelinge oor byvoorbeeld minerale regte en waterregte uitoorlê. Albei regte van die grondeienaar is te midde van valse gerusstellings onteien en genasionaliseer.
Volgens mediaberigte word adj.pres. David Mabuza met politieke moorde in Mpumalanga verbind. Hoe kan hy ’n “staatsmantoespraak” lewer?
In 1994 was die tafel gedek met miljarde rande se beleggings uit die buiteland. Nogtans is alle staatsinstellings deur eindelose korrupsie en wanbestuur vernietig.
Wees versigtig met landboubelange. Valse gerusstellings is goed op die oor, maar pynlik in ontnugtering. Ons is dalk nou in die stilte voor die storm – nie andersom nie. S.L. BOTMA Louisvale