Plaasveiligheid ‘bly voorrangsaak’, sê Cele
LANDELIKE veiligheid en voedselsekerheid is en sal ’n voorrangsaak vir die SA Polisiediens bly, sê mnr. Bheki Cele, Minister van Polisie.
Dit is in antwoord op ’n parlementêre vraag deur me. Cheryllyn Dudley, ACDP-LP, oor die polisie se stappe om veiligheid in landelike gebiede te verbeter, veral in die lig van ’n vlaag plaasaanvalle die afgelope tyd.
Sy noem spesifiek ’n bejaarde egpaar wat in Julie in die vroeë oggendure op hul plaas by Tarlton naby Krugersdorp aangeval en met kookwater verbrand is, en ’n ander voorval dieselfde dag waar ’n egpaar in hul plaashuis naby Koster vasgebind en beroof is.
Cele sê in sy antwoord ’n nasionale gesamentlike operasionele en intelligensie-struktuurkomitee bestaan reeds etlike jare. Dit bestaan uit verskeie belanghebbers en vergader kwartaalliks – die laaste vergadering was op 16 Augustus en die klem was op die onlangse voorvalle, sê hy.
SPESIALISEENHEID ‘NIE OORWEEG’
Volgens die polisie se nuutste misdaadstatistieke was daar 62 moorde in 2017-’18 op plase en kleinhoewes – ’n afname teenoor die vorige boekjaar se 74 moorde. Van die 62 slagoffers was 52 eienaars of bewoners, nege plaaswerkers en een plaasbestuurder. Veediefstal het ook met 7,2% gestyg tot 28 894 gevalle.
Agri SA het intussen daarop gewys dat boere in 2017 ongeveer R7,7 miljard weens misdaad op plase verloor het en dat die mate waartoe voedselprodusente en hul werkers aan wrede aanvalle uitgelewer is, nie weggepraat kan word nie.
Cele sê daar word nie oorweeg om ’n spesialiseenheid op die been
te bring om aanvalle en moorde op plase te help bestry nie. Hy verduidelik dat snelreaksiemagte soos die spesiale taakmag en die taktiese reaksiespan in die afdeling vir operasionele reaksiedienste geleë is en ontplooi kan word om bystand te lewer wanneer voorvalle van geweld plaasvind.
DIÉ STAPPE GENEEM
Hy sê die polisie neem die volgende stappe om voorvalle van geweld op plase en kleinhoewes te voorkom: Brandpunte is geïdentifiseer waar voorvalle plaasgevind het, en voorvalle word ontleed om neigings en modus operandi te bepaal. Operasies om misdaad te voorkom, en meer patrollies, word in brandpunte gedoen. Besoeke aan plase en kleinhoewes. Simulasie-oefeninge word gehou om die reaksievermoë te toets wanneer voorvalle op plase plaasvind. Kapasiteitsbousessies met koördineerders van landelike veiligheid word op alle vlakke gehou. Inspeksies word by landelike en stedelike polisiekantore gedoen. Genl. Khehla Sitole, die nasionale polisiekommissaris, het aangedui dat die landelike veiligheidsplan hersien sal word om ’n groter impak op plaasmoorde, veediefstal en ander misdaad in landelike gebiede te hê.
Mnr. Kobus Breytenbach, hoof van Agri SA se veiligheidskomitee, sê die organisasie het reeds bydraes tot die hersiene plan gelewer en wag nou op terugvoer van die polisie.