PLUIMVEEPRODUSENTE VERWELKOM BESKERMING
DIE plaaslike pluimveebedryf verwelkom die beskermende tarief van 35,9% teen goedkoop ingevoerde hoenderstukke uit die Europese Unie (EU).
“Ons het baie lank hierop gewag,” het mnr. Marthinus Stander, voorsitter van die Suid-Afrikaanse Pluimveevereniging (SAPV) se braaihoenderorganisasie, gesê.
Dié tarief, wat op 28 September in die Staatskoerant afgekondig is, volg op ’n tydelike beskermingstarief van 13,9% op bevrore hoenderstukke uit die EU wat in Desember 2016 in werking gestel is, maar reeds verval het.
Stander sê die nuwe tarief sal baie help om die plaaslike bedryf te beskerm. Ingevolge die vennootskapsooreenkoms tussen die Suider-Afrikaanse Doeane-unie en die EU het Europese uitvoerders onbeperkte toegang tot die Suid-Afrikaanse mark.
“Hulle sien geen probleem daarmee om porsies ver onder kosprys hier te stort nie, terwyl hulle hul eie onmededingende bedryf tot elke prys en met subsidies beskerm.”
Hy wys daarop dat die plaaslike bedryf byvoorbeeld nie enige goedkoop borsvleis aan die EU kan lewer nie weens “twyfelagtige” fitosanitêre versperrings wat opgerig word, terwyl die vennootskapsooreenkoms juis wedersydse handel moet bevorder.
‘VERBRUIKER SAL BETAAL’
Mnr. Donald MacKay, handelsraadgewer en besturende direkteur van XA Trade Advisors, sê die nuwe beskermende tarief is “die jongste veldslag in ’n baie groter oorlog”.
Hy sê dis die verbruiker wat die
prys vir die geveg sal betaal.
Hy sê die tariewe word deel van die prys van voedsel, en namate tariewe styg, word die plaaslike produk duurder.
“Tariewe, soos alle vorms van belasting, word deur Suid-Afrikaners betaal, nie deur uitvoerders nie.”
Die Vereniging van Vleisinvoerders en -uitvoerders (Amie), wys daarop dat Europa Suid-Afrika se grootste handelsvennoot is waarheen baie van die land se eie landbouprodukte uitgevoer word.
“Die EU beskou die beskermingstarief as ’n aansienlike terugslag vir die voorkeurhandelsverhouding wat tussen die EU en
Suid-Afrika geld,” sê mnr. Paul Matthew, aangewese uitvoerende hoof van Amie.
Ingevolge die vryhandelsooreenkoms tussen Suid-Afrika en die EU moet produkte toegelaat word om tariefvry tussen die twee handelsvennote te beweeg. Matthew sê ook die tariefverhoging tref Suid-Afrikaanse verbruikers nadelig.
Hy meen Suid-Afrika kan aanspreeklik gehou word daarvoor dat hy nie die tariefverhoging vooraf met die EU en die Sadu se gesamentlike ontwikkelingskommissie bespreek het nie. Dit is verpligtend ingevolge die vryehandelsooreenkoms.