WAARDEERDER-GENERAAL HAAL NIE DIE PAAL
DIE reusegetal onafgehandelde waardasies by die Waardeerder-generaal het die Departement van Landelike Ontwikkeling en Grondhervorming gedwing om sedert twee maande gelede alle nuwe grondwaardasies van eiendomme wat die departement vir grondhervorming wil aankoop, via die departement se provinsiale kantore aan private waardeerders uit te kontrakteer.
Die lang vertragings met die afhandeling van waardasies uit sy kantoor het dit ook nodig gemaak dat die departement nuwe spertye moes instel om seker te maak dat grondtransaksies tussen die Regering en private verkopers tydig afgehandel kan word.
Luidens ’n omsendbrief van me. Rendani Sadiki, die departement se waarnemende direkteur-generaal, gedateer 3 Augustus 2018, is tydelike maatreëls nodig “om die huidige stadige pas van waardasies in die departement op te los”. Dié maatreëls sal geld “tot op die datum dat die kapasiteitsgebreke in die kantoor van die Waardeerder-generaal reggestel is en verdere waardasiereëlings in ’n omsendbrief bekend gemaak is”.
Kragtens die omsendbrief gaan die departement se provinDie siale dienssentrums voortaan eiendomswaardasies doen op grond van verwysingsraamwerke wat deur die Waardeerder-generaal se kantoor opgestel word en met die gebruik van waardeerders wat deur sy kantoor goedgekeur is.
VERTRAGINGS
Alle waardasieverslae moet binne twee dae ná die waardeerders dit aan die departement verskaf het, aan die Waardeerder-generaal se kantoor gelewer word, en die Waardeerder-generaal moet op sy beurt binne 10 werksdae ná ontvangs dié verslae hersien.
“Die [provinsiale hoofde] moet die [private] waardeerders inlig dat die aanstellings namens die Waardeerder-generaal se kantoor gedoen word om die verwarring uit te skakel wat gewoonlik ontstaan en lei tot vertragings weens kwessies oor aanspreeklikheid wanneer die Waardeerder-generaal die waardasieverslae moet hersien,” lui Sadiki se brief.
Landbouweekblad verneem betroubaar dat die Waardeerder-generaal se kantoor kooptransaksies soms maande lank vertraag weens ’n versuim om spoedig waardasies te aanvaar en ’n aandrang op koopsomme wat buitensporig verskil van selfs die staat se eie waardasies.
Daar is ook kommer onder waardeerders dat die Waardeerder-generaal sy waardasies grond op konsepregulasies wat strydig met die Grondwet kan wees, en waarvan ’n finale weergawe nog nie in die Staatskoerant verskyn het nie. Die tydperk vir kommentaar op die regulasies het op 22 Junie 2017 verstryk.