‘Pas aan om te oorleef’
BESKERM en verbeter jou bestaande produk en bly op die voorpunt van ontwikkeling.
Dít was die raad van mnr. Freddie Wasserfall, voorsitter van SA Stamboek, aan ontvangers van die Elite-pryse vir melkbeesboere in die Vrystaat.
Vrystaatse melkboere beleef tans moeilike tye omdat groot melkkopers hul aankope in die binneland verminder, terwyl prysverlagings en hoë produksiekoste ook sy tol eis.
“As bedryf moet ons saamstaan om te oorleef. Ons kan ons nie verlekker in ’n ander se lot nie, want móre sit jy in dieselfde bootjie,” het Wasserfall gesê.
Melkboerdery was vanjaar op ’n tuimeltreinrit met melkpryse en voerpryse wat wipplank gery het, het dr. Pieter Henning van Meadow Feeds gesê.
Hy het boere aangeraai om ’n ander maatstaf te gebruik om die prys van voer te meet, naamlik die inkomstemarge wat hulle bokant die voerkoste verdien.
“Die regte voer-vermenging en voedingsprosedures is deurslaggewend om koste onder beheer te bring.
WENNERS
Die maatskappy MD Foundation van Ficksburg se MD Dairy is vanjaar as SA Stamboek se Vrystaatse Elite-suiwelprodusent aangewys. Drie boere, mnre. Danie Venter, Jacques Moll en Hannes Pretorius, bedryf die melkery wat uit 1 300 Holstein- en Jerseykoeie in melk bestaan.
Mnr. Cobus Behrens van Waterbron-Jerseys by Ventersburg sê die grootste probleem vir melkboere is om kostedoeltreffend te bly te midde van die wisselende melkprys en voerkoste.
Daar is darem vreugdes ook, sê Behrens, wat ’n dubbelgoue eerbewys gewen het.
“Sekerlik die grootste vreugde vir ’n melkboer is om ’n pasgebore kalfie te sien opstaan, of wanneer dit reën en natuurlik as die melkprys styg, maak dit ons baie bly,” het hy geskerts.
Melkboere wat SA Stamboek se Logix-melkaantekeningstelsel gebruik, kom outomaties in aanmerking vir die kompetisie wat hul kudde se prestasie oor ’n jaar meet.
Goue, silwer en brons eerbewyse word toegeken, asook ’n aantal spesiale Elite-suiwelpryse.